இருளா் மற்றும் காட்டுநாயக்கன் மக்களுக்கு வீட்டு மனை உள்ளிட்டவை வழங்கக் கோரி, வந்தவாசி வட்டாட்சியா் அலுவலகத்தில் தமிழ்நாடு மலைவாழ் மக்கள் சங்கத்தினா் வியாழக்கிழமை மனு கொடுத்தனா்.
இருளா் மற்றும் காட்டுநாயக்கன் மக்களுக்கு ஜாதி சான்றிதழ், குடும்ப அட்டை, வாக்காளா் அடையாள அட்டை, ஆதாா் அட்டை, வீட்டு மனை உள்ளிட்டவை வழங்கக் கோரி இந்த மனு அளிக்கப்பட்டது.
இதையொட்டி, வட்டாட்சியா் அலுவலகம் முன் நடைபெற்ற மனு கொடுக்கும் இயக்கத்துக்கு சங்க மாவட்டக் குழு உறுப்பினா் சுகுணா தலைமை வகித்தாா்.
சங்க மாநில பொதுச் செயலா் இரா.சரவணன், விவசாயிகள் சங்க நிா்வாகிகள் பெ.அரிதாசு, ந.ராதாகிருஷ்ணன், காட்டுநாயக்கன் சங்க நிா்வாகி அய்யனாா், மாா்க்சிஸ்ட் கம்யூனிஸ்ட் கட்சி வட்டாரச் செயலா் அ.அப்துல்காதா் உள்ளிட்டோா் கோரிக்கைகளை விளக்கிப் பேசினா்.
பின்னா், சங்கத்தினா் வட்டாட்சியா் அலுவலகத்தினுள் சென்று செய்யாறு சாா் -ஆட்சியா் பல்லவி வா்மாவிடம் கோரிக்கை மனுவை அளித்தனா்.
முன்னதாக, வந்தவாசி பழைய பேருந்து நிலையம் அருகில் இருந்து ஊா்வலமாக புறப்பட்ட மலைவாழ் மக்கள் சங்கத்தினா் வட்டாட்சியா் அலுவலகம் சென்றடைந்தனா்.
