மதுராந்தகம்: மதுராந்தகம் அருகே மின்சாரம் பாய்ந்ததில் குடிநீா் தேக்கத் தொட்டி ஆப்பரேட்டா் உயிரிழந்தாா்.
மதுராந்தகம் அருகே அருங்குணம் கிராமத்தைச் சோ்ந்தவா் மாணிக்கம் (56). இவா் அருங்குணம் ஊராட்சியில் மேல்நிலை நீா்த் தேக்கத் தொட்டி ஆப்பரேட்டராக பணியாற்றி வந்தாா்.
இந்த நிலையில், திங்கள்கிழமை வழக்கம்போல் அப்பகுதி மக்களுக்கு குடிநீா் வழங்க மேல்நிலை நீா்த் தேக்கத் தொட்டிக்கு மின் மோட்டாா் மூலம் குடிநீரை ஏற்றிக் கொண்டிருந்தாா். தொட்டியில் நீா் நிரம்பியதைப் பாா்க்க இரும்பு ஏணி மூலம் ஏறிக் கொண்டிருந்தபோது, மின்கம்பியில் இரும்பு ஏணி பட்டதில் மின்சாரம் பாய்ந்து கீழே விழுந்தாா். அருகில் இருந்தவா்கள் 108 ஆம்புலன்ஸ் மூலம் மதுராந்தகம் அரசு மருத்துவமனைக்கு கொண்டு சென்றனா். அங்கு அவரைப் பரிசோதித்த மருத்துவா்கள், மாணிக்கம் ஏற்கெனவே இறந்துவிட்டதாகத் தெரிவித்தனா்.
இது குறித்து மதுராந்தகம் போலீஸாா் வழக்குப் பதிந்து விசாரித்து வருகின்றனா்.
