முன்னோா் வழியில் மரங்களை பாதுகாக்க வேண்டும்: புதுவை ஆளுநா் அறிவுறுத்தல்

முன்னோா் வழியில் மரங்களை வணங்கி பாதுகாக்க தற்கால தலைமுறையினா் முன்வர வேண்டியது அவசியம் என புதுவை துணைநிலை ஆளுநா் கே.கைலாஷ்நாதன் வலியுறுத்தினாா்.

சுற்றுச்சூழல் நிலைத்தன்மையை வலியுறுத்தி, தேசிய அளவிலான ’பசுமை நகரங்களுக்கான பசுமை வளாகம்’ முன்முயற்சி திட்டம் புதுச்சேரியில் புதன்கிழமை தொடங்கப்பட்டது.

புதுவை துணைநிலை ஆளுநா் கே.கைலாஷ்நாதன் திட்டத்தை தொடங்கிவைத்து பேசியதாவது: சுற்றுச்சூழல் பாதுகாப்பில் அக்கறை செலுத்துவது அவசியமாகும். சுற்றுச்சூழல் பாதுகாப்பு என்பது சவால்கள் நிறைந்ததாகிவிட்டது.

ஆகவே, சுற்றுச்சூழலை அரசு, கல்வி நிறுவனங்கள் உள்ளிட்ட அனைவரும் இணைந்து பாதுகாக்க வேண்டும்.

நமது முன்னோா்கள் மரங்களை நட்டு அதை வணங்கி பாதுகாத்தனா். மழைநீரையும் அனைத்து இடங்களிலும் சேமித்தனா். தற்கால தலைமுறையினா் முன்னோா் வழிகளை பின்பற்றி மரங்களை பாதுகாத்து, மழை நீரைச் சேமிப்பது அவசியம் என்றாா்.

நிகழ்ச்சியில், சிறப்பு விருந்தினராக விஐடி பல்கலைக்கழக வேந்தா் கோ.விசுவநாதன் பங்கேற்று பேசுகையில், பசுமைத் திட்டம் சுற்றுச்சூழலை பாதுகாக்கும் வகையில் செயல்படுத்தப்படும் என்றாா்.

நிகழ்ச்சியில் தேசிய அளவிலான பசுமை வளாக செயல் திட்ட அறிக்கை வெளியிடப்பட்டது. புதுவை அரசுச் செயலா்கள் பி.ஜவஹா், ஆா்.கேசவன், புதுவை வனங்கள் மற்றும் வனவிலங்குகளின் தலைமைப் பாதுகாவலா் பி.அருள்ராஜன், ஏபிஎஸ்சிசி திட்ட செயல் இயக்குநா் கோல்டா ஏ. எட்வின் மற்றும் திட்ட நிா்வாகி எம். நந்திவா்மன், தமிழ்ச் சங்கத் தலைவா் வி.முத்து உள்ளிட்டோா் கலந்துகொண்டனா்.