நரசிம்மா் கோயில் தோ்த் திருவிழா: ஒருங்கிணைந்து செயல்பட அதிகாரிகளுக்கு அறிவுரை
பெரம்பலூா் அருகே கொள்முதல் நிலையத்தில் வைக்கப்பட்டிருந்த ரூ. 2 லட்சம் மதிப்பிலான மக்காச்சோள மூட்டைகளை திருடிச்சென்ற 5 பேரை போலீஸாா் கைது செய்து திங்கள்கிழமை சிறையில் அடைத்தனா்.
பெரம்பலூா் மாவட்டம், குன்னம் அருகேயுள்ள ஆய்க்குடி கிராமத்தைச் சோ்ந்த காமராஜ், பரவாய் கிராமத்திலுள்ள சமத்துவபுரம் பகுதியில், கடந்த 5 ஆண்டுகளாக மக்காச்சோளம் கொள்முதல் நிலையமும், எடை மேடையும் வைத்துள்ளாா். இந்நிலையில், கடந்த 31 ஆம் தேதி மா்ம நபா்கள் சிலா், அங்கிருந்த மின்சார இணைப்பை துண்டித்து, கண்காணிப்பு கேமராவை சேதப்படுத்தி ரூ. 2 லட்சம் மதிப்பிலான 70 மூட்டைகளை வாகனம் மூலம் திருடிச் சென்றனா். இச் சம்பவம் குறித்து காமராஜ் அளித்த புகாரின் பேரில், குன்னம் போலீஸாா் வழக்குப் பதிந்து விசாரித்தனா்.
இதில், வேப்பந்தட்டை வட்டம், அனுக்கூா் குடிக்காட்டைச் சோ்ந்த பெரியசாமி மகன் பிரகாஷ் (24), காளிதாஸ் மகன் பெரியசாமி (22), இளங்கோவன் மகன் ஆதி (18), ராஜேந்திரன் மகன் பாரதி (20), முத்து மகன் ஹரீஸ் (19) ஆகியோா்தான் திருட்டில் ஈடுபட்டவா்கள் என்பது தெரியவந்தது. இதையடுத்து, மேற்கண்ட 5 பேரையும் கைது செய்த போலீஸாா், மக்காச்சோள மூட்டைகளை திருடுவதற்கு பயன்படுத்திய சுமை ஆட்டோ, 2 இரு சக்கர வாகனங்கள் ஆகியவற்றை பறிமுதல் செய்தனா். தொடா்ந்து, குன்னம் குற்றவியல் நீதிமன்றத்தில் ஆஜா்படுத்தப்பட்ட 5 பேரும் திங்கள்கிழமை திருச்சி மத்திய சிறையில் அடைக்கப்பட்டனா்.
