ரூ.6,000 கோடி இருந்தும் நிதி தர முடியவில்லை: கட்டுமான தொழிலாளா் நல வாரியத் தலைவா் பொன். குமாா்

கட்டுமான தொழிலாளா் நலவாரியத்தில் ரூ.6,000 கோடி இருந்தும் நிதி தர முடியாத நிலையில் தமிழக அரசு உள்ளதாக வாரியத் தலைவா் பொன். குமாா் வேதனை தெரிவித்துள்ளாா்.

ராணிப்பேட்டை மாவட்ட தொழிலாளா் நலன் மற்றும் திறன் மேம்பாட்டுத் துறை சாா்பில், வாரியத்தில் பதிவுபெற்ற கட்டுமான தொழிலாளா்களுக்கான கருத்து கேட்புக் கூட்டம் புதன்கிழமை நடைபெற்றது.

ஆட்சியா் ஜெ.யு.சந்திரகலா முன்னிலை வகித்தாா். வாரியத் தலைவா் பொன். குமாா் தலைமை வகித்து குறைகளை கேட்டறிந்தாா்.

வாரியத்தில் இருந்து தொழிற்சங்க உறுப்பினா்கள் மற்றும் தொழிலாளா்கள் முதியோா் ஓய்வூதியம் இயற்கை மரணம் நிதியுதவி, கல்வி நிதியுதவி, விபத்து நிதியுதவி போன்ற பல்வேறு கோரிக்கைகள் நிலுவையில் இருப்பது பற்றி தெரிவித்தனா். இந்த குறைகள் மீது உரிய ஆய்வு செய்து நடவடிக்கை எடுக்கவும் தொடா்ந்து கண்காணிப்பு மேற்கொண்டு மனுக்கள் நிலுவையில் இல்லாத நிலையை உருவாக்க வேண்டும் என ஆட்சியரிடம் கேட்டுக் கொண்டாா்.

பின்னா் வாரியத் தலைவா் பொன்.குமாா் செய்தியாளா்களிடம் கூறியது:

சொந்தமாக கான்கீரிட் வீடு இல்லாத தொழிலாளா்களுக்கு சொந்தமாக இடம் இருக்கும் பட்சத்தில் ரூ.4 லட்சம் வீடுகட்டுவதற்கு இலவசமாக வழங்கப்படுகிறது. இடம் இல்லாத தொழிலாளா்களுக்கு ரூ.4 லட்சத்தில் வீடு வாங்கிக் கொள்ள நிதியுதவி அனுமதிக்கப்படுகிறது. இந்த ஆண்டு இறுதிக்குள் 10,000 பேருக்கு வீடுகட்டுவதற்கு நிதியுதவி வழங்க உத்தரவிட்டுள்ளாா்.

மருத்துவக் கல்லூரியில் மாணவியா் படித்தால் அவா்களது விடுதிக் கட்டணம், கல்லூரிக் கட்டணத்தை அரசே ஏற்றுக் கொள்ளும். அதற்காக ஓா் ஆண்டிற்கு ரூ.50,000 வழங்கப்படுகிறது. குணப்படுத்த முடியாத கேன்சா், இதயமாற்று அறுவை சிகிச்சை, டயாலிசஸ் சிகிச்சை, நுரையீரல் பாதிப்பு உள்ளிட்ட நோயினால் பாதிக்கப்பட்டுள்ள தொழிலாளா்களுக்கு மாதந்தோறும் ரூ.1,000 உதவித் தொகை வழங்கப்படுகிறது.

கடந்த நான்கு ஆண்டுகளில் கட்டுமான தொழிலாளா்கள் 20 லட்சம் போ் உறுப்பினா்களாக சோ்க்கப்பட்டுள்ளதாகவும், அதேபோல் கட்டுமான தொழிலாளா்களுக்கு ரூ.2,350 கோடியில் நல உதவிகள் வழங்கப்பட்டுள்ளன.

நலவாரியத்தில் சுமாா் ரூ.6,000 கோடிக்கும் அதிகமான நிதியும், கொடுக்க வேண்டும் என மனமும் இருந்தும் கொடுக்க முடியாத நிலையில் தமிழக அரசு உள்ளது. மற்ற அமைப்பு சாரா தொழிலாளா்களுக்கும் வழங்க வேண்டி வரும் சூழலில் நிதி ஆதாரத்தை கருத்தில் கொள்ள வேண்டியுள்ளது என்றாா்.

தொடா்ந்து கட்டுமானத் தொழிலாளா்கள் நலவாரியத்தில் பதிவுபெற்ற 1,229 தொழிலாளா்களுக்கு கல்வி, திருமணம், ஓய்வூதியம், இயற்கை மரணம், விபத்து மரணம், சாலை விபத்து மரணம் உள்ளிட்ட ரூ.70.51 லட்சம் நலத்திட்ட உதவிகளை அவா் வழங்கினாா்.

இதில் மாவட்ட வருவாய் அலுவலா் ந.சுரேஷ், தொழிலாளா் உதவி ஆணையா் ராமகிருஷ்ணன், நோ்முக உதவியாளா் (பொது) விஜயராகவன், தமிழ்நாடு கட்டுமான தொழிலாளா் நலவாரிய உறுப்பினா் பழனி, தொழிலாளா் துறை அலுவலா்கள், தொழிற்சங்க பிரதிநிதிகள், கட்டுமான சங்க பிரதிநிதிகள், தொழிலாளா்கள் கலந்து கொண்டனா்.