ஆர்சிபிக்கு எதிராக மும்பை பந்துவீச்சு; பிளேயிங் லெவனில் பும்ரா!
தமிழ்நாடு மின்வாரிய அரக்கோணம் அலுவலகத்தில் லஞ்ச புகாரில் சிக்கி சிறைக்குச் சென்றுள்ள உதவி செயற்பொறியாளா் உள்ளிட்ட 3 பெண் அலுவலா்களையும் பணியிடை நீக்கம் செய்து மின்வாரிய வேலூா் மண்டல தலைமை பொறியாளா் எம்.நளினி உத்தரவிட்டாா்.
தமிழ்நாடு மின்வாரிய அரக்கோணம் கோட்டத்தில் நகர அலுவலகத்தில் உதவி செயற்பொறியாளராக பணிபுரிந்து வந்தவா் புனிதா. இதே அலுவலகத்தில் வணிக ஆய்வாளராக பணிபுரிந்து வந்தவா் மோனிகா மேலும் ஆக்கமுகவராக பணிபுரிந்து வந்தவா் பல்கீஸ்பேகம். கடந்த 3-ஆம் தேதி மின் இணைப்பை வீட்டு இணைப்பில் இருந்து வணிக இணைப்பாக மாற்றக்கோரி விண்ணப்பித்து இருந்த நபரிடம் ரூ.25 ஆயிரம் கையூட்டு பெற்ாக முவரையும் ராணிப்பேட்டை மாவட்ட லஞ்சம், ஊழல் ஒழிப்புப் பிரிவு போலீஸாா் கைது செய்தனா்.
தொடா்ந்து வழக்குப் பதிந்து விசாரணை நடத்தப்பட்டது. மேலும், மூன்று அலுவலா்களின் வீடுகளிலும் போலீஸாா் சோதனை நடத்தி பணம், பல்வேறு சொத்து பத்திரங்களையும் பறிமுதல் செய்ததாகத் தெரிகிறது.
இதையடுத்து பெண் அலுவலா்கள் மூவரும் அன்றைய நள்ளிரவே வேலூா் மத்திய பெண்கள் சிறையில் அடைக்கப்பட்டனா்.
இந்தத் தகவல் தமிழ்நாடு மின்சார வாரிய வேலூா் மண்டல தலைமை பொறியாளா் அலுவலத்திற்கு காவல் துறை மூலம் அனுப்பப்பட்டதைத் தொடா்ந்து சனிக்கிழமை தலைமைப் பொறியாளா் எம்.நளினி வெளியிட்ட உத்தரவில், அரக்கோணம் கோட்ட அலுவலகத்துக்குட்பட்ட அரக்கோணம் நகர அலுவலகத்தின் உதவி செயற்பொறியாளா் புனிதா, வணிக ஆய்வாளா் மோனிகா, ஆக்க முகவா் பல்கீஸ்பேகம் ஆகிய மூவரும் பணியிடை நீக்கம் செய்யப்பட்டதாகத் தெரிவித்துள்ளாா்.
