விநாயகா மிஷன் சட்டக் கல்லூரியில் மாணவா் சோ்க்கை தொடக்கம்

சென்னை பையனூரில் செயல்பட்டு வரும் வி.எம்.எல்.எஸ் எனப்படும் விநாயகா மிஷன் சட்டக் கல்லூரியில் நிகழாண்டுக்கான மாணவா் சோ்க்கை, கல்லூரியை மாணவா்கள் பாா்வையிடும் நிகழ்வு ஆகியவை செவ்வாய்க்கிழமை நடைபெற்றன.

இதில், தமிழகத்தின் பல்வேறு மாவட்டங்களைச் சோ்ந்த 100-க்கும் மேற்பட்ட மாணவா்கள் மற்றும் அவா்களது பெற்றோா்கள் ஆா்வமுடன் கலந்துகொண்டு, அதற்குப் பிறகு மாணவா் சோ்க்கைக்கு பதிவு செய்தனா். இதில் கல்லூரியின் டீன் அனந்த பத்மநாபன், சட்டக் கல்வியின் முக்கியத்துவம் மற்றும் வி.எம்.எல்.எஸ். வழங்கும் தனித்துவமான வாய்ப்புகளைப் பற்றிய விரிவான விளக்கத்தை வழங்கினாா்.

இதையடுத்து உச்சநீதிமன்றத்தின் மூத்த வழக்குரைஞா் ஏ.பிரான்சிஸ் ஜூலியன், மாணவா்களுக்கு ஊக்கமளிக்கும் உரையாற்றி, அவா்கள் எதிா்கால சட்டப் பயணத்துக்கு வழிகாட்டினாா். இத்துடன், செங்கல்பட்டு தொகுதி சட்டப்பேரவை உறுப்பினா் மற்றும் வழக்குரைஞா் முனீஸ்வரன், சட்டத் துறையில் உள்ள பல்வேறு தொழில்முறை வாய்ப்புகள் மற்றும் அவற்றை எவ்வாறு மாணவா்கள் பின்பற்றலாம் என்பதைக் குறித்து கலந்துரையாடினாா்.

இதில் விநாயகா மிஷன்ஸ் ஆராய்ச்சி நிறுவனத்தின் வேந்தா் ஏ.எஸ். கணேசன், துணைத் தலைவா் அனுராதா கணேசன் மற்றும் மேலாண்மை குழு உறுப்பினா் ஜே.சுரேஷ் சாமுவேல் உள்ளிட்டோா் கலந்துகொண்டனா்.