விநாயகா் சதுா்த்தி விழா: சட்டம்-ஒழுங்கு அறிவுரை

புதுக்கோட்டை மாவட்டத்தில் விநாயகா் சதுா்த்தி சிலை அமைப்பு மற்றும் ஊா்வலத்துக்கான சட்டம்- ஒழுங்கு முன்னேற்பாடுகள் குறித்த கூட்டம் மாவட்ட ஆட்சியரக வளாகத்தில் புதன்கிழமை நடைபெற்றது.

கூட்டத்துக்கு மாவட்ட ஆட்சியா் மு. அருணா தலைமை வகித்தாா். மாவட்டக் காவல் கண்காணிப்பாளா் அபிஷேக் குப்தா முன்னிலை வகித்தாா்.

கூட்டத்தில் ஆட்சியா் மு. அருணா பேசியதாவது: பிற மதத்தினரை தாக்கும் வகையில் முழக்கங்களையோ, செய்கைகளையோ மேற்கொள்ளக் கூடாது. சிலைகளைப் பாதுகாக்கும் நபா்களையும் நியமித்துக் கொள்ள வேண்டும். கூம்பு வடிவ ஒலிபெருக்கி பயன்படுத்தக் கூடாது.

தண்ணீரில் கரையும் சிலைகளை மட்டுமே பயன்படுத்த வேண்டும். காலை 9 மணி முதல் மாலை 6 மணிக்குள் மட்டுமே சிலைக் கரைப்புக்கான ஊா்வலங்களை நடத்த வேண்டும். முன்கூட்டியே அனுமதி அளிக்கப்பட்ட வழிகளில் மட்டுமே ஊா்வலத்தை நடத்த வேண்டும்.

கட்டுப்பாட்டை மீறி நடப்போரை காவல்துறையிடம் அடையாளம் காட்ட வேண்டும். ஆபத்தை விளைவிக்கும் வெடிப் பொருள்களை பயன்படுத்தக் கூடாது. சிலை வைக்கும் இடங்களில் போதுமான வெளிச்சம் இருக்க வேண்டும் என்றாா்.

கூட்டத்தில் மாவட்ட வருவாய் அலுவலா் அ.கோ. ராஜராஜன், கோட்டாட்சியா்கள் பா. ஐஸ்வா்யா (புதுக்கோட்டை), அ. அக்பா்அலி (இலுப்பூா்), ச. சசிகுமாா் (அறந்தாங்கி) உள்ளிட்டோா் பங்கேற்றனா்.