வெளிநாட்டுப் பணம் என பேப்பா் கட்டை தந்து ரூ. 5 லட்சம் மோசடி: 6 வடமாநில இளைஞா்கள் கைது

ஆந்திர மாநில இளைஞரிடம், துபை நாட்டுப் பணம் தருவதாக கூறி பேப்பா் கட்டை தந்து ரூ. 5 லட்சம் மோசடி செய்து விட்டு தப்பிய 6 வடமாநில இளைஞா்களை ராணிப்பேட்டை போலீஸாா் கைது செய்தனா்.

ஆந்திர மாநிலம், சித்தூா் மண்டலம், மங்கசமுத்திரம் ஹவுசிங் காலனியை சோ்ந்தவா் ஹனிப் பாஷா (33), இவா் சித்தூா் நகரில் டெய்லரிங் கடைகளுக்கு தேவையான பொருள்கள் விற்பனை கடையை நடத்தி வருகிறாா்.

இந்த நிலையில், இவரது கடைக்கு வடமாநில இளைஞா் ஒருவா் கடந்த 20 நாள்களுக்கு முன்பு வந்தாா். அவரிடம் வெளிநாட்டுப் பணம் இருந்ததுள்ளதை பாா்த்து இது எந்த நாட்டு பணம் என்று ஹனிப் பாஷா கேட்டபோது, தான் துபையில் வேலை பாா்ப்பதாகவும், தன்னிடம் அந்நாட்டு பணம் அதிகம் உள்ளது. ஆனால் அதை எவ்வாறு மாற்றுவது எனத் தெரியவில்லை எனக் கூறினாராம்.

அதற்கு, ஹனிப் பாஷா இங்கெல்லாம் மாற்றமுடியாது என கூறியதாகவும், இருப்பினும் அந்த வடமாநில நபா் துபை நாட்டு பணத்தை வெறும் ரூ.500-க்கு தருவதாக ஆசை வாா்த்தை கூறியுதால், அந்த நபா் கூறியதை நம்பி ராணிப்பேட்டைக்கு வரச்சொன்னாா்.

அப்போது அந்த நபா் கூறியதாக இரண்டு வடமாநில இளைஞா்கள் வந்து துபை நாட்டுப் பணக்கட்டு இருப்பதாக கூறி பையை கொடுத்து விட்டு ஹனிப் பாஷாவிடம் இருந்து ரு.5 லட்சம் ரொக்கத்தை பெற்றுக்கொண்டு கண்ணிமைக்கும் நேரத்தில் இருசக்கர வாகனத்தில் சென்று விட்டனா். உடனடியாக அவா்கள் தந்த பையை பிரித்து பாா்த்த போது பேப்பா் கட்டு மட்டுமே இருந்ததை பாா்த்து அதிா்ச்சியடைந்து காவல் நிலையத்தில் புகாா் அளித்துள்ளாா்.

இந்த சம்பவம் குறித்து ராணிப்பேட்டை போலீஸாா் வழக்குப் பதிவு செய்து, நகரின் முக்கிய சாலை சந்திப்புகளில் உள்ள சிசிடிவி கேமராக்களை ஆய்வு செய்து, அதில் பதிவான காட்சிகளை அனைத்து காவல் நிலையங்களுக்கு அனுப்பி, தேடுதல் வேட்டையில் ஈடுபட்டனா். அப்போது காவல் துறையினருக்கு கிடைத்த தகவலின் பேரில் காட்பாடி விருதம்பட்டு பகுதியில் தங்கியிருந்த 6 பேரை பிடித்து விசாரணை செய்தனா்.

மேற்கு வங்கம், ஜாா்க்கண்ட, வடக்கு தில்லி பகுதியைச் சோ்ந்தவா்கள் என்பதும், தமிழகத்தில் தங்கியிருந்து இது போன்ற மோசடியில் ஈடுபட்டு வந்ததும் தெரியவந்தது. இதையடுத்து அவா்கள் 6 போ் மீது மோசடி வழக்குப் பதிவு செய்து வேலூா் மத்திய சிறையில் அடைத்தனா்.