விளாத்திகுளத்தை அடுத்த வேம்பாா் பகுதியில் கடலரிப்பால் சேதமுற்ற மீன்பிடி இறங்குதளம், பாலத்தை எம்எல்ஏ ஜீ.வி. மாா்க்கண்டேயன் சனிக்கிழமை ஆய்வு செய்தாா்.
வேம்பாரிலிருந்து நாட்டுப் படகுகள், வள்ளம், தோணி, விசைப்படகுகள் மூலம் 500-க்கும் மேற்பட்ட மீனவா்கள் மீன்பிடித் தொழிலில் ஈடுபட்டுள்ளனா். அவா்களது கோரிக்கையை ஏற்று, 9 ஆண்டுகளுக்கு முன்பு வேம்பாா் கடற்கரையில் மீன்வளத் துறை சாா்பில் ரூ. 11 கோடியில் மீன்பிடி இறங்குதளமும், மீன்களை படகுகளிலிருந்து இறக்கி வாகனங்களில் ஏற்ற வசதியாகவும், கடலரிப்பால் படகுகள் சேதமடையாமல் பாதுகாக்கவும் ‘ப’ வடிவ பாலமும் கட்டப்பட்டன.
இங்கு ஏற்கெனவே இருந்த தூண்டில் வளைவு கல் பாலம் நீரோட்டத் தன்மைக்கு மாறாக அமைக்கப்பட்டதால் கடலரிப்பு வழக்கத்தைவிட கூடுதலாக ஏற்படத் தொடங்கியது. அதன்விளைவாக, மீன்பிடி இறங்குதளம், ‘ப’ வடிவ பாலமும் கடந்த ஓராண்டாக சேதமுற்று காணப்பட்டனவாம்.
இதனிடையே, கடந்த செப். 24ஆம் தேதி இப்பாலத்தில் திடீரென பெரிய அளவிலான விரிசல் ஏற்பட்டு, அவ்வழியாக மீன்களை ஏற்றிச் சென்ற கண்டெய்னா் லாரி கவிழ்ந்தது. மேலும், பாலம் வழியே வாகனங்கள் செல்ல முடியாத நிலை ஏற்பட்டது.
இந்நிலையில், சேதமடைந்த மீன்பிடி இறங்குதளம், பாலத்தை எம்எல்ஏ ஜீ.வி. மாா்க்கண்டேயன் அதிகாரிகளுடன் சென்று சனிக்கிழமை பாா்வையிட்டாா். சேதமடைந்த பாலப் பகுதியில் கூடுதல் ஸ்திரத்தன்மையுடன் அகலப்படுத்தி விரைந்து சீரமைக்க அதிகாரிகளுக்கு அறிவுறுத்தினாா்.
மீன்வளத் துறைப் பொறியாளா் வள்ளி, வேம்பாா் தெற்கு ஊராட்சி மன்ற முன்னாள் தலைவா் ஆரோக்கியராஜ், மாவட்ட மீனவரணி துணை அமைப்பாளா்கள் அந்தோணிராஜ், பெப்பின்காகு, விளாத்திகுளம் கிழக்கு ஒன்றியச் செயலா் சின்னமாரிமுத்து, மாவட்ட மகளிரணி துணை அமைப்பாளா் எப்ரோ மீனா மேரி, ஒன்றிய துணைச் செயலா் புனிதா, கிளைச் செயலா் நல்லமுத்து, ஒன்றிய தகவல் தொழில்நுட்ப அணி தாமஸ் பாக்கியசெல்வி, வேம்பாா் விசைப்படகு உரிமையாளா்கள் சங்க நிா்வாகிகள் ஜெயக்குமாா், மிக்கேல், லூயிஸ் சகாய மாா்சல், அருள்ராஜ், ஜெபமாலை உள்ளிட்டோா் உடனிருந்தனா்.
