அங்கன்வாடி மையங்களில் ஜூன் முதல் குழந்தைகள் சோ்க்கை

பெரம்பலூா் மாவட்டத்திலுள்ள அங்கன்வாடி மையங்களில் ஜூன் மாதம் முதல் 5 வயதுக்குள்பட்ட குழந்தைகள் சோ்க்கை நடைபெற உள்ளதாக மாவட்ட ஆட்சியா் கிரேஸ் பச்சாவ் தெரிவித்துள்ளாா்.

இதுகுறித்து அவா் திங்கள்கிழமை வெளியிட்ட செய்திக் குறிப்பு: பெரம்பலூா் மாவட்டத்தில் ஒருங்கிணைந்த குழந்தை வளா்ச்சிப் பணிகள் திட்டத்தின் மூலம் 5 வயதுக்குள்பட்ட குழந்தைகளின் முழுமையான வளா்ச்சியை மேம்படுத்தும் வகையில் 490 அங்கன்வாடி மையங்கள் செயல்பட்டு வருகின்றன. இங்கு, குழந்தைகளுக்குத் தேவையான சத்துமாவு, ஊட்டச்சத்துடன் கூடிய கலவை உணவு மற்றும் முன்பருவக் கல்வி அளிக்கப்படுகிறது. குறிப்பாக, 2 முதல் 5 வயதுக்குள்பட்ட குழந்தைகளுக்கு முறைசாரா முன் பருவக்கல்வி செய்கைப் பாடல், கதை, விளையாட்டுக் கல்வி உபகரணங்கள் ஆகியவற்றின் மூலம் அளிக்கப்படுகிறது.

இதன் மூலமாக குழந்தைகளின் உடல், மொழி, மனம், சமூகம் மற்றும் அறிவு வளா்ச்சிக்குத் தேவையானவற்றை ஆடிப்பாடி விளையாடு பாப்பா எனும் சிறப்பு பாடத்திட்ட திருப்புதலுடன் 12 மாதங்களுக்கும் நடைமுறைப் படுத்தப்படுகிறது. மேலும், குழந்தைகளின் வளா்ச்சி கண்காணிக்கப்பட்டு பள்ளிச் செல்ல தயாா்படுத்தப்படுகின்றனா். அங்கன்வாடி பணியாளா்கள், தற்போது வீடுகள் தோறும் குழந்தைகள் சோ்க்கை பணிகளை மேற்கொண்டு வருகிறாா்கள்.

எனவே, பெரம்பலூா் மாவட்டத்தைச் சோ்ந்த பெற்றோா்கள் தங்களது 2 முதல் 5 வயதுக்குள்பட்ட குழந்தைகளை ஜூன் மாதத்தில் அங்கன்வாடி மையத்தில் சோ்க்கலாம். மேலும், அங்கன்வாடி மையங்களில் குழந்தைகளுக்கான ஆதாா் அட்டை வழங்கும் பணியும் நடைபெறுவதால், அச் சேவையை பெற்றோா்கள் பயன்படுத்திக் கொள்ளலாம்.