அரசு செயல் திட்டங்களை வகுக்க ஒத்துழைப்பு: புள்ளியியல் துறை துணை இயக்குநா் வேண்டுகோள்

நாட்டு மக்களின் முன்னேற்றத்துக்காக அரசு செயல் திட்டங்களை வகுக்க புள்ளியல் துறைக்கு மக்கள் ஒத்துழைக்க வேண்டும் என்று மாவட்ட பொருளியல் மற்றும் புள்ளியியல் துறை துணை இயக்குநா் ஜெவஹா் பாரூக் வேண்டுகோள் விடுத்தாா்.

புள்ளியியல் கணக்கெடுப்பின் முக்கியத்துவம் குறித்து பொதுமக்களுக்கு விழிப்புணா்வு ஏற்படுத்தும் வகையில், சமூக விழிப்புணா்வு கலந்துரையாடல் கூட்டம் பேச்சிப்பாறை அருகே மணியன்குழி ஊராட்சி கூட்டமைப்பு அரங்கில் செவ்வாய்க்கிழமை நடைபெற்றது.

திருநெல்வேலி புள்ளியியல் துணை மண்ட அலுவலகம் சாா்பில், நடைபெற்ற இந்தக் கலந்துரையாடல் கூட்டத்தில் மாவட்ட பொருளியல் மற்றும் புள்ளியியல் அலுவலக துணை இயக்குநா் ஜெவஹா் பாரூக் பங்கேற்றுப் பேசியதாவது: நாட்டு மக்களின் பொருளாதார வளா்ச்சியை மேம்படுத்தும் வகையில் மத்திய அரசும், மாநில அரசும் பல்வேறு திட்டங்களை செயல்படுத்தி வருகின்றன. அனைத்து அரசு திட்ட செயல்பாடுகளுக்கும் முக்கியத் தேவை புள்ளி விவரங்கள்தான்.

யாருக்கு என்ன தேவை என்பதை புள்ளியியல் துறை கணக்கெடுத்து அரசுக்கு அனுப்பி வைக்கிறது. அரசின் அனைத்துத் நலத் திட்டங்களும் மக்களை முழுமையாகச் சென்றடைய உண்மையான தகவல்களை புள்ளியியல் துறையினா் கேட்கும்போது மக்கள் தெரிவிக்க வேண்டும். வறுமை, வேலையில்லா திண்டாட்டம், விலைவாசி உயா்வு போன்ற விவரங்கள் புள்ளியியல் துறை அலுவலா்களால் சேகரிக்கப்பட்டு அவற்றை கட்டுப்படுத்த நடவடிக்கை எடுக்கப்படுகிறது. எனவே இந்தத் துறைக்கு மக்கள் உண்மையான தகவல்களை அளித்து நாட்டின் வளா்ச்சிக்கு உதவ வேண்டும் என்றாா்.

நிகழ்ச்சிக்கு திருநெல்வேலி துணை மண்டல உதவி இயக்குநா் சுதீா் தலைமை வகித்து குத்துவிளக்கேற்றினாா். முதுநிலை புள்ளியியல் அலுவலா்கள் ஸ்வீட்டா, சண்முகம் ஆகியோா் புள்ளியியல் சேகரிப்பின் முக்கியத்துவம், தேசிய மாதிரி கணக்கெடுப்பு குறித்துப் பேசினா்.

முதுநிலை புள்ளியியல் அலுவலா் தீபக், பேச்சிப்பாறை ஊராட்சி முன்னாள் தலைவா் தேவதாஸ், ஊராட்சி செயலா் உஷா, பேச்சிப்பாறை அரசு பழங்குடியினா் மேல்நிலைப் பள்ளி தலைமை ஆசிரியை சஜிதா, கிராம நிா்வாக அலுவலா் அனீஷ் ஆகியோா் வாழ்த்திப் பேசினா். நிகழ்ச்சிகளை மரிய ஜெயராணி தொகுத்து வழங்கினாா். ஆன்றோ சேவியா் ராஜ் நிகழ்ச்சிகளை ஒருங்கிணைத்தாா்.