அரசு விடுதிகளில் தங்கியுள்ள மாணவா்களின் பாதுகாப்பை உறுதிப்படுத்துவதற்கு முன்னறிவிப்பு இல்லாத திடீா் ஆய்வுகளை திண்டுக்கல் மாவட்ட நிா்வாகம் மேற்கொள்ள வேண்டும் என எதிா்பாா்ப்பு எழுந்துள்ளது.
திண்டுக்கல் மாவட்டத்தில் பிற்படுத்தப்பட்டோா், மிகப் பிற்படுத்தப்பட்டோா், சீா்மரபினா், சிறுபான்மையினா் மாணவ, மாணவிகளுக்கென மொத்தம் 49 விடுதிகள் செயல்பட்டு வருகின்றன. இதில் பள்ளி மாணவா்களுக்கு 28 விடுதிகள், பள்ளி மாணவிகளுக்கு 14 விடுதிகள், கல்லுாரி, பாலிடெக்னிக் படிக்கும் மாணவா்களுக்கு ஓா் விடுதி, மாணவிகளுக்கு 6 விடுதிகள் செயல்படுகின்றன. இதேபோல, ஆதிதிராவிடா் நலத் துறை சாா்பில் பள்ளி மாணவா்களுக்கு 24 விடுதிகள், மாணவிகளுக்கு 13 விடுதிகள், கல்லூரி மாணவா்களுக்கு 3 விடுதிகள், மாணவிகளுக்கு 2 விடுதிகள் என மொத்தம் 42 விடுதிகள் செயல்படுகின்றன. கள்ளா் சீரமைப்புத் துறை சாா்பில், மாணவா்களுக்கு 5 விடுதிகள், மாணவிகளுக்கு 2 விடுதிகள் என 7 அரசு கள்ளா் விடுதிகள் செயல்படுகின்றன. இதுதவிர கொடைக்கானல், கீழ்மலைப் பகுதியில் உண்டு உறைவிடப் பள்ளிகளும் செயல்பட்டு வருகின்றன. இதில் பள்ளி விடுதிகளில் 4 முதல் 12-ஆம் வகுப்பு வரை பயிலும் மாணவ, மாணவிகளுக்கும், கல்லூரி விடுதிகளில் பட்டப்படிப்பு, பட்டமேற்படிப்பு, பாலிடெக்னிக்குகளில் பயிலும் மாணவ, மாணவிகளுக்கும் சோ்க்கை அளிக்கப்படுகிறது.
இந்த விடுதிகளில் தங்கும் மாணவா்களுக்கு உணவு மட்டுமன்றி, மேலும் பல சலுகைகளும் அரசு சாா்பில் வழங்கப்படுகின்றன. விடுதி மாணவா்களின் கல்வி வளா்ச்சிக்கு உதவும் வகையில் அரசு நிதி ஒதுக்கீடு இருந்தும்கூட, பல விடுதிகளில் நிா்ணயிக்கப்பட்ட எண்ணிக்கையில் மாணவா்கள் இல்லை. பெரும்பாலும் தரமான உணவு வழங்கப்படுவதில்லை. குறிப்பாக, மாணவா்களுக்கு விருப்பமில்லாத உணவு வகைகள், காலை சிற்றுண்டி பட்டியலில் இடம் பெறுவதாகவும் குற்றஞ்சாட்டப்படுகிறது. இதனால் மாணவா்களின் சுய ஒழுக்கம் கேள்விக்குறியாக உள்ளது. பல விடுதிகளிலும், சமையலா், காவலா் பணியிடங்கள் நீண்ட காலமாக காலியாக உள்ளன. இதன் காரணமாக, மாணவா்களுக்கு தரமான உணவிலும், பாதுகாப்பிலும் குறைபாடு ஏற்படுவதாகவும் கூறப்படுகிறது. அரசுத் துறை விடுதிகள், அரசு உதவிப் பெறும் பள்ளிகளில் செயல்படும் விடுதிகள் என 100-க்கும் மேற்பட்ட மாணவ, மாணவிகள் விடுதிகள் இருந்தும், அதிகாரிகள் திடீா் ஆய்வு மேற்கொள்வதில்லை. இதுபோன்ற சூழலில் தான், விடுதியில் தங்கிப் படித்த மாணவா் ஒருவா் சுடுநீா் கொட்டி உயிரிழந்திருக்கிறாா்.
மலைக் கிராம மாணவா் உயிரிழப்பு: திண்டுக்கல் மாவட்டம், பாச்சலூா் பகுதியைச் சோ்ந்தவா் பாண்டி. இவரது மகன் ரெங்கராஜ் (13). திண்டுக்கல் பேருந்து நிலையம் அருகிலுள்ள அரசு உதவிப் பெறும் பள்ளியில் 8-ஆம் வகுப்பு படித்து வந்தாா். மலைப் பகுதியைச் சோ்ந்த மாணவா் ரெங்கராஜ், பள்ளியிலுள்ள விடுதியில் தங்கி பயின்று வந்த நிலையில், இரவு உணவு தயாரிப்பதற்காக, சோறு வடித்தபோது சுடுநீரில் வழுக்கி விழுந்து காயமடைந்தாா். மதுரை அரசு மருத்துவமனையிலும், தனியாா் மருத்துவமனையிலும் சிகிச்சை அளிக்கப்பட்ட போதிலும், அவா் சிகிச்சைப் பலனின்றி கடந்த வியாழக்கிழமை உயிரிழந்தாா்.
ஆட்சியா் கவனம் செலுத்த எதிா்பாா்ப்பு: கடந்த 19-ஆம் தேதி திண்டுக்கல் மேற்கு வட்டத்தில் உங்களைத் தேடி உங்கள் ஊரில் திட்ட முகாம் நடைபெற்றது. இந்த முகாமின் ஒரு பகுதியாக, மாவட்ட ஆட்சியா் அலுவலகம் அருகிலுள்ள சென்னமநாயக்கன்பட்டி ஆதிதிராவிடா் நலத் துறை மாணவிகள் விடுதியில் ஆட்சியா் செ. சரவணன் ஆய்வு மேற்கொண்டாா். அப்போது, அங்கு தயாரிக்கப்பட்ட உணவின் தரம், விடுதியில் மாணவிகளுக்கான வசதிகள் குறித்து கேட்டறிந்த ஆட்சியா், பின் மாணவிகளுடன் கலந்துரையாடினாா். இதுபோன்ற முகாம் நடைபெறும் காலங்களில், அதிகாரிகளின் வருகையை எதிா்பாா்த்து முன்னெச்சரிக்கை நடவடிக்கை மேற்கொள்ளப்படுவது வழக்கம். ஆனால் மாவட்டத்தின் பல்வேறு பகுதிகளில் செயல்படும் விடுதிகளையும் முன்னறிவிப்பு இல்லாமல், திடீா் ஆய்வு செய்ய வேண்டும். அரசுத் துறை சாா்ந்த மாணவா்கள் விடுதிகள் மட்டுமன்றி, பள்ளிகளின் நேரடி நிா்வாகத்தின் கீழ் செயல்படும் விடுதிகளையும் கண்காணிக்க வேண்டும் என கோரிக்கை எழுந்திருக்கிறது.
இதுதொடா்பாக அரசுப் பள்ளி ஆசிரியா் ஒருவா் கூறியதாவது: ஒவ்வொரு விடுதியிலும் தங்கியுள்ள மாணவா்களின் எண்ணிக்கை குறித்த விவரங்களை வெளிப்படையாக அறிவிக்க வேண்டும். அரசுப் பள்ளிகளில் மாணவா் சோ்க்கை மீது கவனம் செலுத்தும் மாவட்ட நிா்வாகம், இந்த விடுதிகளிலும் நிா்ணயிக்கப்பட்ட எண்ணிக்கையில் மாணவா் சோ்க்கையை உறுதி செய்வதோடு, கல்வி ஆண்டு முழுவதும் அந்த மாணவா்கள் விடுதியில் தங்கி இருப்பதையும் கண்காணிக்க வேண்டும். சில விடுதிகளில் உள்ள குறைபாடுகளை ஆய்வுக்குச் சென்ற அலுவலா்கள் குறிப்பு எழுதியும் கூட சம்பந்தப்பட்டவா்கள் மீது நடவடிக்கை எடுக்கவில்லை என்றாா் அவா்.
