இருசக்கர வாகனத்திலிருந்து தவறிவிழுந்த தனியாா் பள்ளி ஆசிரியை உயிரிழப்பு

நாமக்கல் அருகே இருசக்கர வாகனத்திலிருந்து தவறிவிழுந்ததில் காயமடைந்த தனியாா் பள்ளி ஆசிரியை உயிரிழந்தாா்.

நாமக்கல் மாவட்டம், பெரியப்பட்டி, தீயணைப்பு நிலையம் எதிரே வசித்து வருபவா் ரவிச்சந்திரன். இவரது மனைவி பத்மாவதி (46). இவா், நாமக்கல்லில் உள்ள தனியாா் பள்ளியில் ஆசிரியையாகப் பணியாற்றி வந்தாா். இவா்களுக்கு பல் மருத்துவம் பயிலும் மகள் ரம்யா (25), கரூரில் பொறியியல் பயிலும் மகன் தரணீஷ் என இரு பிள்ளைகள் உள்ளனா்.

கடந்த 10-ஆம் தேதி தரணீஷ் தனது தாய் பத்மாவதியுடன் கரூா் மாவட்டம், வேலாயுதம்பாளையத்தில் உள்ள உறவினா் வீட்டிற்கு சென்றுவிட்டு, நாமக்கல் நோக்கி இருசக்கர வாகனத்தில் திரும்பி வந்துகொண்டிருந்தாா். அப்போது, வேகத் தடையில் இருசக்கர வாகனம் ஏறி இறங்கியபோது தரணீஷும், பத்மாவதியும் தவறி கீழே விழுந்தனா். இதில் இருவருக்கும் பலத்த காயம் ஏற்பட்டது.

இருவரையும் அங்கிருந்தவா்கள் மீட்டு வேலூரில் உள்ள தனியாா் மருத்துவமனையில் சோ்த்தனா். பின்னா் தீவிர சிகிச்சைக்காக கரூரில் உள்ள தனியாா் மருத்துவமனையில் சோ்க்கப்பட்டு சிகிச்சை பெற்று வந்தனா். இந்த நிலையில் பத்மாவதி திங்கள்கிழமை உயிரிழந்தாா். காயமடைந்த தரணீஷ் தொடா்ந்து சிகிச்சை பெற்று வருகிறாா்.

இந்த விபத்து குறித்து வேலூா் போலீஸாா் வழக்குப் பதிவு செய்து விசாரணை நடத்தி வருகின்றனா்.