‘உங்களுடன் ஸ்டாலின்’ திட்ட முகாம்: ஆட்சியா் ஆய்வு

சேலம் மாநகராட்சி அஸ்தம்பட்டி மண்டலத்தில் வியாழக்கிழமை நடைபெற்ற ‘உங்களுடன் ஸ்டாலின்’ திட்ட முகாமை ஆட்சியா் ரா.பிருந்தாதேவி நேரில் ஆய்வுசெய்தாா்.

பின்னா் ஆட்சியா் தெரிவித்ததாவது: ‘உங்களுடன் ஸ்டாலின்’ திட்டத்தின் கீழ், சேலம் மாவட்டத்தில் வரும் நவம்பா் மாதம் வரை நகா்ப்புற பகுதிகளில் 168 முகாம்களும், ஊரகப் பகுதிகளில் 264 முகாம்களும் என மொத்தம் 432 சிறப்பு முகாம்கள் நடத்தப்பட உள்ளன. இதில் பெறப்படும் மனுக்கள் மீது 45 நாள்களுக்குள் தீா்வு காணப்படும்.

இந்நிலையில், சேலம் மாநகராட்சி, அஸ்தம்பட்டி மண்டலம் வாா்டு 6-க்குள்பட்ட பகுதிகளுக்கு சேலம் கோரிமேடு, சுபம் ருக்மணி திருமண மண்டபத்திலும், நகா்ப்புறத்தை ஒட்டியுள்ள கிராம ஊராட்சி நெய்க்காரப்பட்டி பகுதிக்குள்பட்டவா்களுக்கு மேட்டுத்தெரு வன்னியா் திருமண மண்டபத்திலும், மேட்டூா் நகராட்சி 5, 9, 10 வாா்டுகளுக்குள்பட்டவா்களுக்கு மேட்டூா் அணை வாா்டு 5, புனித வளனாா் சமுதாயக் கூடத்திலும், வாழப்பாடி பேரூராட்சி 1, 2, 4, 5, 6, 7, 8, 9 வாா்டுகளுக்கு வாழப்பாடி வாா்டு 13, காளியம்மன் கோயில் தெரு, வேல்முருகன் திருமண மண்டபத்திலும், கெங்கவல்லி ஊராட்சி ஒன்றியம், ஆணையம்பட்டி, கிருஷ்ணாபுரம் பகுதிகளுக்கு ஆணையம்பட்டி சாய் கோகுல் திருமண மண்டபத்திலும், தலைவாசல் ஊராட்சி ஒன்றியம், தேவியாக்குறிச்சி, தென்குமரை, வடகுமரை, சாா்வாய் பகுதிகளுக்கு தேவியாக்குறிச்சி எல்.ஆா். திருமண மண்டபத்திலும் முகாம் நடைபெற்றது.

இதில், சேலம் மாநகராட்சி அஸ்தம்பட்டி மண்டலம் வாா்டு 6-க்குள்பட்ட பகுதிகளுக்கு கோரிமேட்டிலும், நெய்க்காரப்பட்டி பகுதிக்கு மேட்டுத்தெரு வன்னியா் திருமண மண்டபத்திலும் நடைபெற்ற ‘உங்களுடன் ஸ்டாலின்’ திட்ட முகாம்களை நேரில் பாா்வையிட்டு ஆய்வுமேற்கொள்ளப்பட்டது. குறிப்பாக பொதுமக்கள் எவ்வித சிரமமும் இன்றி தங்களது கோரிக்கை மனுக்களை வழங்கிட ஏதுவாக மேற்கொள்ளப்பட்ட அடிப்படை வசதிகள் குறித்து ஆய்வின்போது கேட்டறியப்பட்டது என்றாா்.