ஓய்வு பெற்ற விமானப் படை அதிகாரி வங்கிக் கணக்கில் ரூ.2.80 லட்சம் திருட்டு! பெண் உள்பட இருவா் கைது!

வங்கி ஏடிஎம் அட்டை மூலம் ஓய்வு பெற்ற விமானப் படை அதிகாரி வங்கிக் கணக்கில் ரூ. 2.80 லட்சத்தை திருடிய வழக்கில் பெண் உள்பட இருவரை போலீஸாா் வெள்ளிக்கிழமை மாலை கைது செய்தனா்.

மதுரை எல்லீஸ் நகரைச் சோ்ந்தவா் கிருஷ்ணசாமி (81). இவா் விமானப் படையில் அதிகாரியாக பணியாற்றி ஓய்வு பெற்றவா். இவரின் மூத்த மகள் லதா, அவரது கணவருடன் சென்னையில் வசித்து வருகிறாா். இரண்டாவது மகள் சுதா, மகன் மனோஜ் ஆகியோா் ஆஸ்திரேலியாவில் வசித்து வருகின்றனா்.

இந்த நிலையில், எல்லீஸ் நகரில் தனியாக வசித்து வந்த கிருஷ்ணசாமிக்கு அதே பகுதியில் காய்கறிக் கடை நடத்தி வரும் லட்சுமணன் உதவியாக இருந்தாா். இதனிடையே கடந்த 12-ஆம் தேதி லட்சுமணன் கடைக்குச் சென்ற கிருஷ்ணசாமி தனது ஏடிஎம் அட்டையை அங்கு வைத்து விட்டுச் சென்றாா். மீண்டும் திரும்பி வந்து பாா்த்த போது ஏடிஎம் அட்டை அங்கு இல்லையாம்.

இதைத் தொடா்ந்து, கடந்த 15-ஆம் தேதி மதுரையில் உள்ள தங்க நகைக் கடையிலிருந்து கிருஷ்ணசாமியின் கைப்பேசிக்கு முப்பத்து மூன்றரை கிராம் நகை வாங்கியதாகவும், அதற்கான தொகை ரூ. 2 லட்சத்து 80 ஆயிரத்து 510-க்கு அவா் ஏடிஎம் அட்டையை பயன்பத்தியதாகவும் குறுஞ்செய்தி வந்தது.

இதையடுத்து நகைக் கடைக்குச் சென்று அவா் விசாரணை நடத்தியதில், காய்கறிக் கடை உரிமையாளா் லட்சுமணன்(30), அவரது உறவினரான நாகேஸ்வரி (38) ஆகிய இருவரும் ஏடிஎம் அட்டையின் ரகசிய எண்ணைப் பயன்படுத்தி நகை வாங்கி இருப்பது தெரியவந்தது.

அவா்களிடம் கேட்ட போது நகையை வாங்கி அடகு வைத்துவிட்டதாகவும், இதுபற்றி யாரிடமாவது கூறினால் கிருஷ்ணசாமியை கொலை செய்து விடுவதாகவும் மிரட்டினா்.

இதுகுறித்த புகாரின் பேரில், எஸ்.எஸ்.காலனி போலீஸாா் வழக்குப் பதிந்து லட்சுமணன், நாகேஸ்வரி ஆகிய இருவரையும் வெள்ளிக்கிழமை கைது செய்தனா்.