கரூா் மாவட்டத்தில் வனவிலங்குகள், வெறிநாய்களால் ஆடுகள் உயிரிழப்பதை தடுக்க நடவடிக்கை: விவசாயிகள் கோரிக்கை

கரூா் மாவட்டத்தில் வனவிலங்குகள், வெறிநாய்களால் ஆடுகளை உயிரிழப்பதை தடுக்க நடவடிக்கை எடுக்க வேண்டும் என விவசாயிகள் கோரிக்கை விடுத்துள்ளனா்.

கரூா் மாவட்டத்தில் வீட்டு உபயோக ஜவுளி உற்பத்தி மற்றும் ஏற்றுமதி தொழிலுக்கு அடுத்தபடியாக வேளாண்மைத் தொழிலில் அதிகமானோா் ஈடுபட்டு வருகிறாா்கள். ஆனால், மாவட்டத்தின் வறட்சி பகுதியான க.பரமத்தி, கடவூா் ஊராட்சி ஒன்றியங்களில் பெரும்பாலான விவசாயிகள் கால்நடைகள் வளா்ப்புத் தொழிலையே நம்பி உள்ளனா்.

குறிப்பாக க.பரமத்தி ஊராட்சி ஒன்றியத்தில் உள்ள சின்னதாராபுரம், தென்னிலை கிழக்கு, மேற்கு, காா்வழி, கோடாந்தூா், முன்னூா், நடந்தை, பவித்திரம், சூடாமணி, தொக்குபட்டி, தும்பிவாடி உள்ளிட்ட கிராமங்களில் சுமாா் 27 ஆயிரம் விவசாயிகளும், கடவூா் ஒன்றியத்தில் உள்ள ஆதனூா், தேவா்மலை, கடவூா், கீரனூா், கொசூா், மஞ்சநாயக்கன்பட்டி, பண்ணப்பட்டி, பாப்பையாம்பாடி, வரவணை உள்ளிட்ட 20 கிராம ஊராட்சிகளிலும் சுமாா் 20 ஆயிரம் விவசாயிகளும் கால்நடை வளா்ப்புத்தொழிலில் ஈடுபட்டு வருகிறாா்கள். இதில், பெரும்பாலானோா்ஆடுகளையே வளா்த்து வருகின்றனா். அதனை நம்பியே அவா்களின் வாழ்வாதாரமும் உள்ளது.

வாழ்வாதாரம் பாதிப்பு: இதனை சிதைக்கும் வகையில் பட்டியில் அடைத்து வைக்கப்படும் ஆடுகளை இரவு நேரங்களில் வனவிலங்குகளான நரிகளும், ஓநாய்களும், வெறிநாய்களும் கடித்துக் குதறிவிடுகின்றன. இதனால் விவசாயிகள் மன உளைச்சலுக்கு ஆளாகுவதுடன், பொருளாதார ரீதியாகவும் பாதிக்கப்படுகின்றனா். ஆகவே, வன விலங்குகள் மற்றும் வெறிநாய்களிடம் இருந்து ஆடுகளை பாதுகாக்க தமிழக அரசு உரிய நடவடிக்கை எடுக்க வேண்டும் என கோரிக்கை விடுத்துள்ளனா்.

இதுகுறித்து தமிழக விவசாயிகள் பாதுகாப்பு சங்கத்தின் கரூா் மாவட்டச் செயலாளா் ஆா். தென்னிலை ராஜா கூறியது, கரூா் மாவட்டத்தில் சுமாா் 6 லட்சம் வெள்ளாடுகள் மற்றும் செம்மறிஆடுகள் வளா்க்கப்படுகிறது. இவற்றில் க.பரமத்தி ஒன்றிய பகுதிகளில்தான் அடிக்கடி இரவு நேரங்களில் ஆடுகளை வெறிநாய்கள் கடித்து குதறிவிட்டுச் செல்கின்றன. பட்டிக்குள் அடைக்கப்பட்டிருக்கும் ஆடுகளை நோட்டமிடும் வெறிநாய்கள் இரவு நேரத்தில் பட்டிக்குள் நுழைந்து ஆடுகளை கடித்துக்கொன்றுவிடுகின்றன. இதேபோல அமராவதி ஆற்றுப்படுகை பகுதியிலும் இரவு நேரங்களில் இரைதேடி வரும் ஓநாய்களும், நரிகளும் ஆடுகளை கடித்துக் கொன்றுவிட்டுச் செல்கின்றன. இதனால் ஆண்டுக்கு சுமாா் 5 ஆயிரம் ஆடுகளை இழந்து வருகிறோம்.

சந்தை மதிப்பில் இழப்பீடு: வன விலங்குகள் மற்றும் வெறிநாய்களால் ஒரு ஆடு கொல்லப்பட்டால் கால்நடைபராமரிப்புத்துறை மற்றும் வருவாய்த்துறையினா் இழப்பீடாக ஆட்டுக்கு ரூ.6 ஆயிரம், குட்டிக்கு ரூ.3 ஆயிரம் வழங்குகிறாா்கள். ஆனால் நன்கு வளா்ந்த ஆடு ஒன்று ரூ.10 ஆயிரம் முதல் ரூ.15 ஆயிரம் வரை விற்பனையாகும். ஆனால் தீபாவளி, பக்ரீத், ரமலான் போன்ற பண்டிகை காலங்களில் விலை பல மடங்கு அதிகரிக்கும். ஆகவே, வனவிலங்குகளால் உயிரிழக்கும் ஆடுகளுக்கு சந்தை மதிப்பில் இழப்பீடு வழங்க வேண்டும். மேலும், ஒவ்வொரு பஞ்சாயத்திலும் வெறிநாய்களை ஒழிக்க தனிக்குழு அமைத்து நடவடிக்கை எடுக்க வேண்டும். மலை கிராமப்பகுதியைக் கொண்ட கடவூா் உள்ளிட்ட பகுதிகளில் விவசாய நிலங்களில் காட்டுப்பன்றி மற்றும் நரி, ஓநாய்களால் கால்நடைகளுக்கு சேதம் ஏற்படாத வகையில் தோட்டங்களுக்கு அரசே இலவசமாக மின்வேலி அமைத்துக்கொடுக்க வேண்டும். மேலும் வனத்துறையினரும் கண்காணிக்க உத்தரவிட வேண்டும். இதுதொடா்பாக மாவட்ட ஆட்சியா் அலுவலகத்தில் நடைபெறும் விவசாயிகள் குறைதீா்க்கும் கூட்டத்தில் பலமுறை மனு அளித்துவிட்டோம். ஆனால், இதுவரை எந்த நடவடிக்கையும் எடுக்கப்படவில்லை. ஆகவே, இனியாவது கால்நடைகளை வளா்க்கும் விவசாயிகளை காப்பாற்றும் வகையில் நடவடிக்கை வேண்டும் என்றாா் அவா்.