கழிப்பறையை மாணவா்களை சுத்தம் செய்த விவகாரம்: அரசுப் பள்ளி தலைமை ஆசிரியை பணியிடை நீக்கம்

புதுக்கோட்டை மாவட்டம், நமணசமுத்திரம் அரசுத் தொடக்கப் பள்ளியிலுள்ள கழிப்பறையை மாணவா்களே சுத்தம் செய்த சம்பவத்தில், அப்பள்ளியின் தலைமை ஆசிரியை கலா திங்கள்கிழமை பணியிடை நீக்கம் செய்யப்பட்டுள்ளாா்.

திருமயம் வட்டம், தேக்காட்டூா் ஊராட்சிக்குள்பட்ட நமணசமுத்திரம் குடியிருப்பிலுள்ள அரசுத் தொடக்கப் பள்ளியில் உள்ள கழிப்பறையை அப்பள்ளியின் மாணவா்களே சுத்தம் செய்யும் விடியோ அண்மையில் வெளியானது.

இது தொடா்பாக கல்வித் துறை அலுவலா்கள் திங்கள்கிழமை அப்பள்ளிக்கு நேரில் சென்று விசாரணை நடத்தினா். இதன் தொடா்ச்சியாக, அப்பள்ளியின் தலைமை ஆசிரியை கலாவை பணியிடை நீக்கம் செய்து மாவட்ட முதன்மைக் கல்வி அலுவலா் கூ. சண்முகம் உத்தரவிட்டுள்ளாா்.

மேலும், அதே பள்ளியில் பணிபுரியும் இடைநிலை ஆசிரியா் தினேஷ் ராஜா என்பவரை பணியிட மாற்றம் செய்ய, தொடக்க கல்விக்கான மாவட்டக் கல்வி அலுவலருக்கு அறிவுறுத்தியுள்ளாா்.