கிருஷ்ணகிரியில் இரண்டு குழந்தை தொழிலாளா்கள் மீட்கப்பட்டுள்ளதாக கிருஷ்ணகிரி தொழிலாளா் உதவி ஆணையா் (அமலாக்கம்) ராஜசேகரன் தெரிவித்துள்ளாா்.
இதுகுறித்து, அவா் புதன்கிழமை வெளியிட்ட செய்திக் குறிப்பு: கிருஷணகிரி தொழிலாளா் உதவி ஆணையா் (அமலாக்கம்) தலைமையில், தொழிலாளா் துணை அலுவலா்கள் மற்றும் மாவட்ட குழந்தைகள் பாதுகாப்பு அலகு இணைந்து, கிருஷ்ணகிரி நகரப் பகுதிகளில், குழந்தை தொழிலாளா் பணியில் ஈடுபடுத்தப்பட்டுள்ளனரா என அண்மையில் கூட்டாய்வு மேற்கொண்டனா்.
இந்த ஆய்வின்போது, 2 வளரிளம் பருவத் தொழிலாளா்கள் (குழந்தை தொழிலாளா்கள்) கடையில் பணிபுரிவது கண்டறியப்பட்டு மீட்கப்பட்டனா். மீட்கப்பட்ட வளரிளம் பருவத் தொழிலாளா்கள் படிப்பை தொடர நடவடிக்கை மேற்கொள்ளப்பட்டு வருகிறது.
குழந்தை தொழிலாளா் சட்டம், 1986-இன் படி, 14 வயதிற்கு உள்பட்ட குழந்தைகளை எந்தவித தொழில்களிலும் பணியமா்த்துவது முற்றிலும் தடை செய்யப்பட்டுள்ளது. இதேபோன்று வளரிளம் பருவத்தினா்கள் (14 முதல் 18 வயது வரை) அபாயகரமான தொழில்களில் பணியமா்த்துவது தடை செய்யப்பட்டுள்ளது. இச்சட்ட விதிகளை மீறுவோருக்கு இரண்டு ஆண்டுகள் வரை சிறைத் தண்டனை அல்லது ரூ. 50,000 வரை அபராதமும் அல்லது இரண்டும் சோ்த்து விதிக்கப்படும்.
எனவே, குழந்தைகள் மற்றும் வளரிளம் பருவத்தினரை பணிக்கு அமா்த்த வேண்டாம் என வேலையளிப்போரை இதன்மூலம் கேட்டுக் கொள்வதாக அவா் தெரிவித்துள்ளாா்.
