குடிசை மாற்று வாரிய வீட்டின் மேற்கூரை இடிந்து விபத்து: இரு பெண்கள் காயம்

சென்னை தண்டையாா்பேட்டையில் குடிசை மாற்று வாரிய வீட்டின் மேற்கூரை இடிந்து விழுந்ததில் இரு பெண்கள் காயமடைந்தனா்.

தண்டையாா்பேட்டை வஉசி நகா் 7-ஆவது குறுக்குத் தெருவைச் சோ்ந்தவா் பெ.முனியம்மாள் (54). இவா், அங்குள்ள தமிழ்நாடு குடிசை மாற்று வாரிய குடியிருப்பில் வசித்து வருகிறாா். முனியம்மாள் வீட்டுக்கு, அதேப் பகுதியில் வசிக்கும் அவரது சகோதரி க.கோவிந்தம்மாள் (52) வியாழக்கிழமை வந்திருந்தாா். இருவரும் வீட்டின் வரவேற்பு அறையில் இருந்து பேசிக் கொண்டிருந்தனா். அப்போது வீட்டின் மேற்கூரையின் மேல் பகுதி திடீரென இடிந்து விழுந்தது. இதில் இருவரும் காயமடைந்தனா்.

அவா்களது அலறல் சப்தம் கேட்டு, அங்கு வந்த பக்கத்து வீட்டினா் இருவரையும் மீட்டு அருகே உள்ள தனியாா் மருத்துவமனையில் சோ்த்தனா்.

விபத்து குறித்து புது வண்ணாரப்பேட்டை போலீஸாா் விசாரணை நடத்தினா்.