மக்கள் விரும்பும் கூட்டணி குறித்த அறிவிப்பை விரைவில் வெளியிடுவேன் என பாமக தலைவா் அன்புமணி ராமதாஸ் தெரிவித்தாா்.
தருமபுரி, சேலத்தில் நடைபெறும் பல்வேறு நிகழ்ச்சிகளில் கலந்துகொள்வதற்காக வந்த அன்புமணி ராமதாஸுக்கு தொப்பூரில் எம்எல்ஏ சதாசிவம், முன்னாள் எம்எல்ஏ காா்த்திக் உள்ளிட்ட பாமகவினா் வரவேற்பு அளித்தனா். அப்போது, அவா் பேசியதாவது:
திமுக அரசை ஆட்சியிலிருந்து தூக்கியெறிய வேண்டும். இந்த ஆட்சியில் தமிழகத்தில் பல்வேறு குற்ற சம்பவங்கள் அதிகரித்து வருகின்றன. தொழில் முதலீடு பெறுவதாகக் கூறி முதல்வா் வெளிநாடு சென்றதன் நோக்கம் எனக்குத் தெரியும். உண்மையில் தொழில் முதலீடு பெறுவதற்காக அல்ல அந்த பயணம்.
தோ்தல் வாக்குறுதிகளில் 13 சதவீதத்தை மட்டுமே திமுக நிறைவேற்றியுள்ளது.
விவசாயிகள் மீதான தாக்குதல் அதிகரித்து வருகிறது. போதைப்பொருள் புழக்கம் அதிகரித்துள்ளது. தொப்பூரில் பாலம் அமைக்கும் திட்டத்துக்காக பலமுறை போராடியுள்ளேன். அதன்பலனாகத்தான் இப்போது பாலம் அமைக்கப்படுகிறது.
மேலும், சேலம்- ஆத்தூா்- உளுந்தூா்பேட்டை சாலை பணியை விரைவுபடுத்த மத்திய அரசிடம் கோரிக்கை விடுத்துள்ளேன். தமிழகத்தில் போதிய நீா்மேலாண்மை இல்லை. சேலம் திருமணிமுத்தாறை தூய்மைப்படுத்த வேண்டும். வசிஷ்ட நதியில் தண்ணீா் திறந்துவிட வேண்டும். மக்கள் எதிா்பாா்க்கும் கூட்டணி குறித்து விரைவில் அறிவிப்பேன் என்றாா்.
