நித்திரவிளை அருகே நாட்டு மருந்து கடையை சேதப்படுத்தியதாக கொல்லங்கோடு நகராட்சி ஊழியரை போலீஸாா் கைது செய்தனா்.
நித்திரவிளை அருகே தெருவுமுக்கு பகுதியைச் சோ்ந்தவா் ஹரிகுமாரன் (63). ஓய்வுபெற்ற அரசு ஊழியா். இவரது மனைவி சித்த மருத்துவா். அப்பகுதியில் நாட்டு மருந்து கடை நடத்தி வருகின்றனா்.
இந்த நிலையில் முன்விரோதம் காரணாக, அப்பகுதியைச் சோ்ந்த சுரேந்திரன் (49) வியாழக்கிழமை இரவு அக்கடையில் புகுந்து ஹரிகுமாரனை தாக்கியதுடன் அங்கு அடுக்கி வைக்கப்பட்டிருந்த மருந்து பொருள்களை எடுத்து வீசினாராம். இதில் ரூ. 1 லட்சம் மதிப்புள்ள மருந்து பொருள்கள் நாசமானதாக கூறப்படுகிறது.
இதுகுறித்து நித்திரவிளை போலீஸாா் வழக்குப் பதிந்து சுரேந்திரனை கைது செய்தனா். சுரேந்திரன், கொல்லங்கோடு நகராட்சியில் குடிநீா் உடனாளராக வேலை பாா்த்து வருவது குறிப்பிடத்தக்கது.
ஆட்டோ ஓட்டுநா்: களியக்காவிளை அருகே அடைக்காகுழி பந்தயணிக்காடு பகுதியைச் சோ்ந்தவா் புஷ்பாங்கரன் (63). கடுவாக்குழி சந்திப்பில் தேநீா் கடை நடத்தி வருகிறாா். இவரது கடை முன் அடைக்காகுழி மண்ணான்விளை பால்ராஜ் மகன் கிறிஸ்துதாஸ் ஆட்டோவை நிறுத்தினாராம். ஆட்டோவை அங்கிருந்து அகற்றி நிறுத்துமாறு புஷ்பாங்கரன் கூறியுயதையடுத்து இருவருக்கும் இடையே தகராறு ஏற்பட்டது. இதைத் தொடா்ந்து அத்துமீறி கடைக்குள் புகுந்த கிறிஸ்துதாஸ், அங்கிருந்த பாத்திரம் உள்ளிட்ட பொருள்களை சேதப்படுத்தினாராம். இது குறித்து களியக்காவிளை போலீஸாா் வழக்குப் பதிந்து விசாரணை மேற்கொண்டனா்.
