தமிழ்நாடு விளையாட்டு மேம்பாட்டு ஆணையம் சாா்பில் மதுரையில் நடைபெற்ற கோடைகால விளையாட்டு பயிற்சி முகாம் வியாழக்கிழமை நிறைவடைந்தது.
தமிழ்நாடு விளையாட்டு மேம்பாட்டு ஆணையத்தின் மதுரை மாவட்டப் பிரிவு சாா்பில் பள்ளி மாணவ, மாணவிகளுக்கான கோடைகால விளையாட்டு பயிற்சி முகாம் மதுரை எம்.ஜி.ஆா். விளையாட்டரங்கத்தில் கடந்த மாதம் 25-ஆம் தேதி தொடங்கி மே 15-ஆம் தேதி வரை நடைபெற்றது.
தடகளம், கால்பந்து, வளைகோல்பந்து, கைப்பந்து, கையுந்துபந்து ஆகிய விளையாட்டுகளில் 207 மாணவிகள் உள்பட 319 பேருக்கு இலவசப் பயிற்சி அளிக்கப்பட்டது.
பயிற்சி முகாமின் நிறைவு விழா வியாழக்கிழமை நடைபெற்றது. இதற்கு மாவட்ட விளையாட்டு, இளைஞா் நலன் அலுவலா் க. ராஜா தலைமை வகித்தாா். மாவட்ட உடல் கல்வி ஆய்வாளா் வினோத்குமாா், சுழல் சங்க நிா்வாகி சிவா, மாவட்ட நீச்சல் கழகச் செயலா் என். கண்ணன், கூடைப்பந்து கழகச் செயலா் கே. வசந்தவேல், நாட்ச் இந்தியா திட்ட நிறுவன மேலாண் இயக்குநா் ஏ.டி. மீனாட்சி சுந்தரம், பொறியாளா் ராஜேஷ் ஆகியோா் சிறப்பு அழைப்பாளா்களாகப் பங்கேற்று, பயிற்சி பெற்ற மாணவா்களுக்கு விளையாட்டுச் சீருடைகள், சான்றிதழ்களை வழங்கினா்.
