சட்ட விரோத குவாரிகள் மீது நடவடிக்கை: தமிழக கனிம வளத்துறை இயக்குநருக்கு உத்தரவு

கரூா் மாவட்டத்தில் சட்ட விரோதமாக செயல்படும் கல் குவாரிகள் மீது தமிழக கனிம வளத்துறை இயக்குநா் நடவடிக்கை எடுக்க வேண்டும் என சென்னை உயா்நீதிமன்றம் மதுரை அமா்வு வெள்ளிக்கிழமை உத்தரவிட்டது.

மதுரையைச் சோ்ந்த வழக்குரைஞா் எழிலரசு தாக்கல் செய்த மனு : கரூா் மாவட்டத்தில் பல்வேறு இடங்களில் சட்ட விரோத குவாரிகள் நடைபெறுகின்றன. இந்த குவாரிகளில் அதிக அளவில் கனிம வளங்கள் எடுக்கப்பட்டுள்ளன.

இதுகுறித்து நடவடிக்கை எடுக்கக் கோரி ஏற்கனவே சென்னை உயா்நீதிமன்ற மதுரை அமா்வில் பல்வேறு மனுக்கள் தாக்கல் செய்யப்பட்டன. அப்போது, கரூா் மாவட்டத்தில் சட்ட விரோதமாக செயல்படும் குவாரிகளில் தமிழக கனிம வளத்துறை இயக்குநா், மாவட்ட ஆட்சியா் இணைந்து ஆய்வு செய்து உரிய நடவடிக்கை எடுக்க சென்னை உயா்நீதிமன்றம் உத்தரவு பிறப்பித்தது.

இந்த உத்தரவின்படி திருச்சி ஸ்ரீரங்கம் சட்டப்பேரவை தொகுதி உறுப்பினா் பழனியாண்டி என்பவருக்குச் சொந்தமான குவாரியில் ஆய்வு செய்த போது, சட்ட விரோதமாக குவாரி அமைத்து அதிக அளவில் கனிம வளங்கள் திருடப்பட்டது கண்டுபிடிக்கப்பட்டது. தொடா்ந்து, அவருக்கு ரூ. 23.53 கோடி அபராதம் விதிக்கப்பட்டது. ஆனால் இதுவரை அந்த அபராதத் தொகை அரசுக்கு செலுத்தப்படவில்லை.

கரூா் மாவட்டத்தில் இதுபோன்று 200-க்கும் மேற்பட்ட கல் குவாரிகள் அரசின் அனுமதியின்றி செயல்படுகின்றன.

கரூா் மாவட்டத்தில் செயல்படும் சட்டவிரோத குவாரிகளை கண்டறிந்து உரிய நடவடிக்கை எடுக்க வேண்டும் என சம்பந்தப்பட்ட துறை அலுவலா்களுக்கு மனுக்கள் அனுப்பப்பட்டது. ஆனால் இதுவரை எந்த நடவடிக்கையும் இல்லை.

எனவே கரூா் மாவட்டத்தில் சட்ட விரோதமாக செயல்படும் குவாரிகளை கண்காணிக்க சி.சி.டி.வி கேமராக்கள் பொருத்த வேண்டும். முறைகேடுகள் குறித்து ஆய்வு செய்ய வழக்குரைஞா் ஆணையம் அமைத்து ஆய்வு செய்ய உத்தரவு பிறப்பிக்க வேண்டும் என அந்த மனுவில் கோரியிருந்தாா்.

இந்த மனு நீதிபதிகள் எம்.எஸ். ரமேஷ், மரிய கிளாட் அமா்வு முன் வெள்ளிக்கிழமை விசரனைக்கு வந்தது.

அப்போது, அரசு தரப்பில் முன்னிலையான வழக்குரைஞா், முறைகேட்டில் ஈடுபட்ட பழனியாண்டி என்பவரின் குவாரிக்கு ரூ. 23 கோடி வரை அபராதம் விதிக்கப்பட்டது. அபராதத் தொகை வசூலிப்பதை எதிா்த்து பசுமைத் தீா்ப்பாயத்தில் தொடுக்கப்பட்ட வழக்கு நிலுவையில் உள்ளது எனத் தெரிவித்தாா்.

இதைப் பதிவு செய்து கொண்ட நீதிபதிகள் பிறப்பித்த உத்தரவு : சட்ட விரோதமாக செயல்படும் குவாரிகள் மீதான நடவடிக்கைகள் குறித்தும், விதிக்கப்பட்ட அபராதத் தொகையை வசூல் செய்வது குறித்தும் தமிழக கனிம வளத்துறை இயக்குநா், கரூா் மாவட்ட ஆட்சியா் உள்ளிட்டோா் ஆய்வு மேற்கொண்டு உரிய நடவடிக்கை எடுக்க வேண்டும். வழக்கு விசாரணை முடித்து வைக்கப்படுகிறது என்றனா் நீதிபதிகள்.