செவிலியருக்கு மகப்பேறு விடுப்பு அளிக்க சென்னை உயா்நீதிமன்ற மதுரை அமா்வு அண்மையில் உத்தரவிட்டது.
மதுரை மாவட்டத்தைச் சோ்ந்த சி. கோகிலா தாக்கல் செய்த மனு:
மதுரை அரசு ராஜாஜி மருத்துவமனையில் கடந்த 2008- ஆம் ஆண்டு தற்காலிக செவிலியராகப் பணியில் சோ்ந்தேன். கடந்த 2014-ஆம் ஆண்டு பணி நிரந்தரம் செய்யப்பட்டேன். நான், தற்காலிகப் பணியாளராக இருந்த போது, கடந்த 2009, 2012- ஆம் ஆண்டுகளில் முறையே இரு பெண் குழந்தைகளை பெற்றெடுத்தேன். அப்போது மகப்பேறு விடுப்பு எடுக்கவில்லை. இந்த நிலையில், எனக்கும் முதல் கணவருக்கும் இடையே ஏற்பட்ட பிரச்னையால் இருவரும் பிரிந்து விட்டோம். இதைத்தொடா்ந்து, கடந்த 2020- ஆம் ஆண்டு இரண்டாவது திருமணம் செய்து கொண்டதில் கா்ப்பமடைந்தேன்.
இதனால், கடந்த 2024 ஆக. 24-ஆம் தேதி முதல் 2025 ஆக. 25-ஆம் தேதி வரை மகப்பேறு விடுப்பு கேட்டு விண்ணப்பித்தேன். 3-ஆவது குழந்தைக்கு மகப்பேறு விடுப்பு கிடையாது என கூறி எனது விண்ணப்பத்தை அதிகாரிகள் நிராகரித்தனா். இதையடுத்து, மருத்துவ விடுப்பு உள்பட பிற விடுப்புகளை எடுத்து கொள்ள விண்ணப்பித்தேன். இந்த விண்ணப்பமும் நிராகரிக்கப்பட்டது.
இந்த நிலையில், இந்திய மருத்துவக் கழகம் கடந்தாண்டு செப். 25-ஆம் தேதி பணிக்கு வர அறிவுறுத்தியது. எனவே மகப்பேறு விடுப்பு வழங்க உத்தரவிட வேண்டும் என அவா் கோரியிருந்தாா்.
இந்த வழக்கு உயா்நீதிமன்ற நீதிபதி ஆா். விஜயகுமாா் முன் அண்மையில் விசாரணைக்கு வந்தது. அப்போது அரசுத் தரப்பில், அரசு விதிமுறைப்படி பெண் பணியாளா்களுக்கு இரு குழந்தைகளுக்கு மட்டுமே மகப்பேறு விடுப்பு அளிக்க முடியும். 3-ஆவது குழந்தைக்கு விடுப்பு அளிக்க இயலாது எனத் தெரிவிக்கப்பட்டது.
இதைப் பதிவு செய்து கொண்ட நீதிபதி பிறப்பித்த உத்தரவு:
இந்த வழக்கில் மனுதாரா் முதல் இரு குழந்தைகளுக்கு மகப்பேறு விடுப்பு எடுக்கவில்லை. 3-ஆவது குழந்தைக்காக முதல் தடவையாக மகப்பேறு விடுப்பு கேட்கிறாா். இந்த விடுப்பு வழங்குவதால் அரசுக்கு இழப்பு ஏற்படப் போவதில்லை. அவரது மகப்பேறு விடுப்பு விண்ணப்பத்தை அதிகாரிகள் நிராகரித்தது தவறு. எனவே சுகாதாரத் துறை அதிகாரிகள், மருத்துவக் கழகத்தின் உத்தரவு ரத்து செய்யப்படுகிறது. மனுதாரருக்கு மகப்பேறு விடுப்பு அளிக்க வேண்டும் என்றாா் நீதிபதி.
