ஆத்தூா் அருகே அம்மம்பாளையத்தில் சாலை விபத்தில் தாய் உயிரிழந்த நிலையில், காயமடைந்த மகளும் உயிரிழந்தாா்.
சேலம் மாவட்டம் ஆத்தூரை அடுத்த அம்மம்பாளையம் பகுதியைச் சோ்ந்தவா் சமையல் தொழிலாளி பெரியசாமி (47). இவரது மனைவி கிருஷ்ணவேணி (41). மகள் பானுப்பிரியா (24). இவா் சென்னையில் தனியாா் நிறுவனத்தில் பணிபுரிந்து வந்தாா்.
கடந்த ஞாயிற்றுக்கிழமை பானுப்பிரியாவை தனது இருச்சக்கர வாகனத்தில் பேருந்து ஏற்றிவிடுவதற்கு அழைத்துச் சென்ற கிருஷ்ணவேணி, சாலையக் கடக்கும்போது அரசுப் பேருந்து மோதியதில் நிகழ்விடத்திலேயே உயிரிழந்தாா்.
இந்த விபத்தில் பலத்த காயமடைந்த பானுப்பிரியா தீவிர சிகிச்சைக்காக சேலம் அரசு மருத்துவமனைக்கு அனுப்பி வைக்கப்பட்டாா். இந்நிலையில் சிகிச்சை பலனின்றி அவா் உயிரிழந்தாா். இச்சம்பவம் குறித்து போலீஸாா் விசாரணை மேற்கொண்டு வருகின்றனா்.
