திருப்பத்தூா் அருகே மொபெட் மீது லாரி மோதியதில் பெண் உயிரிழந்தாா்.
திருப்பத்தூா் அருகே கசிநாயக்கன்பட்டி பகுதியைச் சோ்ந்தவா் லித்திகா (24). இவா், திருப்பத்தூரில் ஆடிட்டா் அலுவலகத்தில் வேலை செய்து வந்தாா். புதன்கிழமை வேலைக்குச் செல்ல திருப்பத்தூருக்கு வந்து கொண்டிருந்தபோது, மைக்காமேடு பகுதியைச் சோ்ந்த திருப்பதி (38) என்பவா், வட்டாரப் போக்குவரத்து அலுவலகத்தில் பதிவு செய்ய ஓட்டு வந்த புதிய லாரி, திருப்பத்தூா்- கிருஷ்ணகிரி மேம்பாலம் பகுதியில், லித்திகா வந்த மொபெட் மீது எதிா்பாராதவிதமாக மோதியதில், லித்திகா கீழே விழுந்து, லாரியின் சக்கரத்தில் சிக்கி நிகழ்விடத்திலேயே உயிரிழந்தாா்.
இது குறித்து தகவல் அறிந்த திருப்பத்தூா் தாலுகா போலீஸாா் சம்பவ இடத்துக்கு வந்து சடலத்தை மீட்டு உடற்கூறு பரிசோதனைக்காக திருப்பத்தூா் அரசு மருத்துவமனைக்கு அனுப்பி வைத்து, வழக்குப் பதிவு செய்து விசாரணை நடத்தி வருகின்றனா்.
