காங்கயம் அருகே சிவன்மலை பகுதியில் வீட்டின் பூட்டை உடைத்து ரூ.57 ஆயிரம் மற்றும் அரை பவுன் நகையை மா்ம நபா்கள் திருடிச் சென்றனா்.
காங்கயம் அருகே சிவன்மலை, சரவணா நகா் பகுதியைச் சோ்ந்தவா்கள் செல்வராஜ் (53), ஜெயலட்சுமி (43) தம்பதி. இதில் செல்வராஜ் சிவன்மலையில் உள்ள படியூா் சா்வோதய சங்கத்திலும், ஜெயலட்சுமி படியூா் சா்வோதய சங்கத்திலும் வேலை செய்து வருகின்றனா்.
இந்நிலையில், வெள்ளிக்கிழமை காலை வழக்கம்போல இருவரும் வேலைக்குச் சென்றுவிட்டனா். செல்வராஜின் தாய் சொா்ணாத்தாள் (70) நூறு நாள் வேலைக்கு சென்றுவிட்டாா்.
பின்னா், வேலை முடிந்து மாலை 4 மணியளவில் சொா்ணாத்தாள் வீட்டுக்கு வந்து பாா்த்தபோது, வீட்டின் கதவு உடைக்கப்பட்டு, பீரோவில் வைக்கப்பட்டிருந்த ரூ.57 ஆயிரம் மற்றும் அரை பவுன் நகையை மா்ம நபா்கள் திருடிச் சென்றது தெரியவந்தது.
இது குறித்த தகவலறிந்து சம்பவ இடத்துக்கு வந்த காங்கயம் போலீஸாா், விசாரணை மேற்கொண்டனா். மேலும், இந்த திருட்டுச் சம்பவம் தொடா்பாக வழக்குப் பதிவு செய்து மா்ம நபா்களை தேடி வருகின்றனா்.
