தமிழகத்தின் 2,200 மலைக்கிராமங்களிலும் அடிப்படை வசதிகளை செய்ய அரசு முயற்சி: அமைச்சா் மா.சுப்பிரமணியன்

ஒசூா்: தமிழகத்தில் உள்ள 2, 200 மலைக் கிராமங்களிலும் அடிப்படை வசதிகளை செய்துதர முயற்சி மேற்கொள்ளப்பட்டுள்ளது என்று மாநில மக்கள் நல்வாழ்வுத் துறை அமைச்சா் மா.சுப்பிரமணியன் கூறினாா்.

கிருஷ்ணகிரி மாவட்டத்துக்கு ஞாயிற்றுக்கிழமை இரவு வந்த அவா், திங்கள்கிழமை அதிகாலை தேன்கனிக்கோட்டை வட்டத்தில் உள்ள ஆலஹள்ளி, மாட்டுப்பட்டிக்குட்டை மலைக் கிராமங்களுக்கு 14 கி.மீ.

தொலைவுக்கு நடந்துசென்று மலைவாழ் மக்களை சந்தித்து மக்களைத் தேடி மருத்துவம் திட்டத்தின்கீழ் அளிக்கப்படும் சிகிச்சைகள் குறித்து கேட்டறிந்தாா். அப்போது அமைச்சா் பேசியதாவது:

கடந்த 4 ஆண்டுகளுக்கு முன்பு உயா் அலுவலா்களுடன் பெட்டமுகிலாளம் மலைக் கிராமத்தில் உள்ள 8 மலைக் கிராமங்களில் ஆய்வு செய்தேன். அப்போது 2 போ் செயற்கை கால்கள் தேவை என கேட்டனா். இதையடுத்து முதல்வா் மு.க.ஸ்டாலின் ஆம்புலன்ஸ் வசதி மற்றும் 2 பேருக்கு செயற்கைக் கால் வசதிகளை செய்து கொடுத்துள்ளாா்.

தமிழகத்தில் 2,200 மலைக் கிராமங்கள் உள்ளன. இந்த மலைக் கிராமங்களில் பல இடங்களில் சாலை வசதிகள் இல்லை. எனவே, மலைவாழ் மக்கள் அனைவருக்கும் அடிப்படை வசதிகளை செய்து தருவதற்கான முயற்சிகளை செய்து வருகிறோம். தமிழகத்தில் 300 மலைக் கிராமங்களில் ஆய்வு செய்துள்ளேன். அதில் 200 கிராமங்களுக்கு அதிகாரிகள் சென்றதில்லை. நாங்கள் சென்றுள்ளோம். கடைக்கோடி மனிதருக்கும் மருத்துவச் சேவை சென்றடைய வேண்டும் என்பதே முதல்வரின் திட்டம்.

இந்தப் பகுதியில் சாலை அமைக்க கேட்டுள்ளீா்கள். சாலை அமைப்பதற்கு வனத்துறை அனுமதி பெறவேண்டும். இங்கு வந்துள்ள மாவட்ட வன அலுவலா் சாலை அமைக்க உறுதி அளித்துள்ளாா்.

மலைக் கிராமங்களில் இளம்வயது திருமணங்களைத் தடுக்க அரசு நடவடிக்கை எடுத்து வருகிறது. சரியான வயதில் பெண்களுக்கு திருமணம் செய்ய வேண்டும் என வலியுறுத்துகிறோம். திருமண வயதை எட்டிய பிறகே திருமணம் செய்துகொள்ள வேண்டும் என உறுதிமொழி எடுத்துக் கொள்ள வேண்டும்.

பள்ளிக் கல்வித் துறை சாா்பில் எண்ணற்ற திட்டங்கள் செயல்படுத்தப்படுகின்றன. குழந்தைகளை பள்ளிக்கு அனுப்பினால் அவா்கள் முன்னேறி, உங்களையும் முன்னேற்றம் அடைய செய்வாா்கள். குழந்தைகளால் மட்டுமே உங்களின் வாழ்க்கை தரத்தை உயா்த்த முடியும் என்றாா்.

இதில் ஒசூா் வன உயிரினக் காப்பாளா் பகான் ஜெகதீஷ் சுதாகா், மாவட்ட சுகாதார அலுவலா் ரமேஷ்குமாா், வட்டார மருத்துவ அலுவலா் ராஜேஷ்குமாா் உள்ளிட்டோா் உடனிருந்தனா்.