கன்னியாகுமரி மாவட்டம், மேற்கு தொடா்ச்சி மலை அடிவாரக் காட்டுப் பகுதியில் வசிக்கும் பழங்குடியின பெண், தான் பயின்ற தொடக்கப் பள்ளியிலேயே தலைமை ஆசிரியையாக உயா்ந்து பள்ளிக்கும், பழங்குடியின சமூகத்துக்கும் பெருமை சோ்த்துள்ளாா்.
கன்னியாகுமரி மாவட்டத்தில் மேற்கு தொடா்ச்சி மலை அடிவாரக் காடுகளில் சுமாா் 48 குடியிருப்புகள் உள்ளன. இங்கு ஆதிவாசி பழங்குடி காணி இன மக்கள் வசித்து வருகின்றனா். கல்வி, வேலைவாய்ப்புகளில் மிகவும் பின்தங்கிய நிலையில் இவா்கள் வாழ்ந்து வருகின்றனா். கடந்த கால் நூற்றாண்டு காலமாகத்தான் இந்த மக்கள் வசிக்கும் கிராமத்துக்கு மின்சாரம், சாலை உள்ளிட்ட அடிப்படை வசதிகள் படிப்படியாக நிறைவேற்றப்பட்டன. இந்த மக்களின் கல்வி மேம்பாட்டுக்காக பேச்சிப்பாறை, பத்துகாணி உள்ளிட்ட இடங்களில் பழங்குடியினா் உண்டு உறைவிடப் பள்ளிகள் செயல்பட்டு வருகின்றன. எனினும், இந்தச் சமூகத்தில் பெண் குழந்தைகள் பள்ளி படிப்பை முடித்து உயா் கல்வி பயில்வது அரிதாகவே உள்ளது.
இந்த நிலையில், இந்த சமூகத்தைச் சோ்ந்த ஷீலா (41), தான் படித்த தொடக்கப் பள்ளியிலேயே தலைமை ஆசிரியையாகப் பொறுப்பேற்று பள்ளிக்கும், பழங்குடியின சமூகத்துக்கும் பெருமை சோ்த்துள்ளாா்.
கன்னியாகுமரி மாவட்டத்தில் கடைக்கோடி கிராமமான கடையல் பேரூராட்சி, பேணுகாஞ்சிரம் பாறை பகுதியைச் சோ்ந்த கோவிந்தன்-பாறுகுட்டி தம்பதியின் மூத்த மகள் ஷீலா. இவா், தனது தொடக்க கல்வி, மேல்நிலைக் கல்வியை தனது கிராமத்துக்கு அருகில் உள்ள பழங்குடியினா் உண்டு உறைவிடப் பள்ளியான பத்துகாணி அரசு மேல்நிலைப் பள்ளியில் பயின்றாா். பின்னா், திண்டுக்கல் மாவட்டம், ஒட்டன்சத்திரத்தில் உள்ள ஒரு கல்வி நிறுவனத்தில் ஆசிரியா் பட்டயப் பயிற்சி முடித்தாா். 2007 இல் ஈரோடு மாவட்டம், பா்கூரில் உள்ள அரசுப் தொடக்கப் பள்ளியில் ஆசிரியையாகப் பணியில் சோ்ந்த இவா், அதன்பிறகு கன்னியாகுமரி மாவட்டம், பேச்சிப்பாறை அரசு பழங்குடியினா் உண்டு உறைவிட தொடக்கப் பள்ளிக்கும், 2010 இல் தனது சொந்த ஊரை அடுத்த வட்டப்பாறை அரசு பழங்குடியினா் தொடக்கப் பள்ளிக்கு இடமாறுதலாகி பணிபுரிந்து வந்தாா்.
அங்கு 12 ஆண்டுகளாகப் பணிபுரிந்து வந்த இவா், அதே பள்ளியில் தலைமை ஆசிரியையாக அண்மையில் பணி உயா்வு பெற்றாா். இந்த நிலையில், கடந்த ஜூலை 14 ஆம் தேதி அங்கிருந்து இடம் மாறுதலாகி, தான் கல்வி பயின்ற பத்துகாணி அரசு பழங்குடியினா் உண்டு உறைவிட தொடக்கப் பள்ளியில் தலைமை ஆசிரியையாகப் பொறுப்பேற்றாா். தனது விடாமுயற்சியின் மூலம் தான் பயின்ற பள்ளிக்கும், பழங்குடியின சமூகத்துக்கும் அவா் பெருமை சோ்த்துள்ளாா்.
இதுகுறித்து அவா் கூறியதாவது:
பழங்குடியின மாணவா்கள் மேல்நிலைக் கல்விக்குப் பிறகு உயா்கல்விப் பயில்வது கடினமாகவே உள்ளது. நான் ஆசிரியையாக வேண்டும் என்ற கனவை எனது பெற்றோா் நிறைவேற்றி தந்தனா். தற்போது நான் பயின்ற பள்ளியிலேயே தலைமை ஆசிரியையாகப் பொறுப்பேற்றிருக்கிறேன். எனக்குக் கிடைத்த இந்தப் பணி, கன்னியாகுமரி மாவட்டத்தில் பழங்குடியின சமூகத்தினருக்கும், குறிப்பாக மாணவிகளுக்கும் உத்வேகம் தரும் என நினைக்கிறேன் என்றாா் அவா்.
இவரது கணவா் மது, ரப்பா் பால்வடிப்பு சாா்ந்த விவசாயம் செய்து வருகிறாா்; மூத்த மகன் சபரீஷ் பிளஸ் 2வும், இளைய மகன் சக்திவேல் 9ஆம் வகுப்பும் பயின்று வருகின்றனா்.
