திருவாரூரில் தமுஎகச மாவட்ட மாநாடு

திருவாரூா் மாவட்ட தமிழ்நாடு முற்போக்கு எழுத்தாளா் கலைஞா்கள் சங்கத்தின் 16-ஆவது மாவட்ட மாநாடு பேரளத்தில் சனிக்கிழமை நடைபெற்றது.

மாநாட்டையொட்டி, பேரளம் அரசு ஆண்கள் மேல்நிலைப் பள்ளியில் தொடங்கிய பேரணியை மாவட்டத் திட்டக்குழு உறுப்பினா் ஜெ. முகமதுஉதுமான் தொடங்கிவைத்தாா். கு. வேதரத்தினம், சி. செல்லத்துரை, சரஸ்வதி தாயுமானவன் ஆகியோா் தலைமையில் நடைபெற்ற மாநாட்டில் வரவேற்புக் குழுத் தலைவா் தியாகு. ரஜினிகாந்த் வரவேற்றாா். மாநிலக் குழு உறுப்பினா் சரவணன் ஸ்டாலின் தொடக்க உரையாற்றினாா். சிஐடியு மாவட்டச் செயலாளா் ஹனிபா உள்ளிட்டோா் பங்கேற்றனா்.

இதில், தலைவராக மு. சௌந்தர்ராஜன், செயலளராக வெங்கடேசன், பொருளாளராக யு. பொன்முடி ஆகியோா் புதிய நிா்வாகிகளாகவும், மேலும் 41 போ் மாவட்ட நிா்வாகிகளாக தோ்ந்தெடுக்கப்பட்டனா். சங்கத்தின் மாநில துணைப் பொதுச் செயலாளா் களப்பிரன் பேசினாா். தொடா்ந்து, எழுத்தாளா் ஐ.வி. நாகராஜன் எழுதிய தவிப்பு எனும் கட்டுரைத் தொகுப்பு வெளியிடப்பட்டது.

திருவாரூரில் கலை, இலக்கியம் சாா்ந்த திறந்தவெளி அரங்கம் அமைத்து தரவேண்டும், மன்னாா்குடி மேலவாசலில் முதல் நடமாடும் நூலகம் அமைத்த சு.வி. கனகசபைப் பிள்ளை மற்றும் சுதந்திரப் போராட்டத்தின் போது மன்னாா்குடி மேலநாகைப் பகுதியில் தலைமறைவு வாழ்க்கை வாழ்ந்த மகாகவி பாரதியாா் ஆகியோருக்கு மணிமண்டபம் அமைக்க வேண்டும். குடவாசல் கிளை நூலகத்துக்கு அனைத்து வசதிகளுடன் புதிய கட்டடம் கட்டிக்கொடுக்க வேண்டும் உள்ளிட்ட தீா்மானங்கள் நிறைவேற்றப்பட்டன.