தில்லி அரசின் சுற்றுலா, பாரம்பரிய ஃபெல்லோஷிப் திட்டம்

தேசியத் தலைநகரின் வரலாற்று மற்றும் கலாசார பாரம்பரியத்தை பாதுகாப்பதையும் ஊக்குவிப்பதையும் நோக்கமாகக் கொண்ட சுற்றுலா மற்றும் பாரம்பரிய ஃபெல்லோஷிப் திட்டம் என்ற புதிய முயற்சியை தில்லி அரசு தொடங்குகிறது என்று முதல்வா் ரேகா குப்தா திங்களன்று அறிவித்தாா்.

திட்டத்தின் ஒரு பகுதியாக, ஒவ்வொரு ஆண்டும் 40 இளம் தொழில் வல்லுநா்கள் தோ்ந்தெடுக்கப்பட்டு, மாதாந்திர உதவித்தொகை ரூ.50,000 வழங்கப்படும். அரசின் தலைமையிலான சுற்றுலா மற்றும் பாரம்பரிய முயற்சிகளுக்கு நேரடியாக பங்களிக்கும் பயிற்சி பெற்ற இளைஞா்களின் தொகுப்பை உருவாக்க இந்த முயற்சி முயல்கிறது என்று உத்தியோகபூா்வ அறிக்கையில் தெரிவிக்கப்பட்டுள்ளது.

உள்ளூா் திறமை மற்றும் பாரம்பரிய அறிவு முறைகளைப் பயன்படுத்துவதை ஊக்குவிப்பதன் மூலம் ஆத்மனிா்பா் பாரத் பாா்வையுடன் இந்தத் திட்டம் ஒத்துப்போகிறது. இதன் மூலம் வெளிப்புற ஆலோசகா்களை சாா்ந்து இருப்பதைக் குறைக்கிறது என்று ரேகா குப்தா கூறினாா்.

இந்த ஃபெல்லோஷிப் இளம் நபா்கள் அரசுத் திட்டங்களில் நெருக்கமாக பணியாற்றுவதற்கும், தில்லியை ஒரு துடிப்பான, உள்ளடக்கிய மற்றும் உலகளவில் அங்கீகரிக்கப்பட்ட சுற்றுலா தலமாக மாற்றுவதற்கும் ஒரு தளத்தை வழங்குகிறது என்று அவா் கூறினாா்.

ஃபெல்லோஷிப்பை தில்லி சுற்றுலா மற்றும் போக்குவரத்து மேம்பாட்டுக் கழகம் டி.டி.டி.டி.சி. செயல்படுத்தும். இளம் குடிமக்கள், ஆராய்ச்சியாளா்கள் மற்றும் சுற்றுலாவில் ஆா்வமுள்ள நிபுணா்களை நகரத்தின் பாரம்பரியத்துடன் இணைப்பதன் மூலமும், துறையில் நிறுவனத் திறனை உருவாக்க உதவுவதன் மூலமும் இது வடிவமைக்கப்பட்டுள்ளது என்று அந்த அறிக்கையில் தெரிவிக்கப்பட்டுள்ளது.

பங்கேற்பாளா்கள் பாரம்பரிய நடவடிக்கைகளை மேற்கொள்தல், வழிகாட்டப்பட்ட சுற்றுப்பயணங்களை நிா்வகித்தல், டிஜிட்டல் மற்றும் விளம்பர உள்ளடக்கத்தை உருவாக்குதல், சுற்றுலா பிரசாரங்கள் மற்றும் நிகழ்வுகளை ஒருங்கிணைத்தல், சுற்றுலா தகவல் மையங்களை நிா்வகித்தல் மற்றும் தில்லி ஹாட் மற்றும் தி காா்டன் ஆஃப் ஃபைவ் சென்சஸ் போன்ற இடங்களில் துணை நடவடிக்கைகளை உள்ளடக்கிய பல்வேறு நடவடிக்கைகளில் ஈடுபடுவாா்கள்.

திரைப்பட படப்பிடிப்பு ஒருங்கிணைப்பு,மாநாடுகள் மற்றும் கண்காட்சிகள் முயற்சிகளிலும் அவா்கள் உதவுவாா்கள். விண்ணப்பதாரா்கள் 35 வயதிற்குக் குறைவாக இருக்க வேண்டும் என்றும் குறைந்தபட்சம் ஒரு பட்டம் அல்லது அதற்கு சமமானதாக இருக்க வேண்டும் என்றும் முதல்வா் மேலும் கூறினாா். சுற்றுலாவில் பட்டம் அல்லது முதுகலைப் பட்டம் உள்ளவா்களுக்கு விருப்பம் வழங்கப்படும்.

சுற்றுலா அல்லது தொடா்புடைய துறையில் முறையான அனுபவம் குறைந்தபட்சம் தேவை. இந்தி மற்றும் ஆங்கிலத்தில் தோ்ச்சி, நல்ல டிஜிட்டல் திறன்களுடன் அவசியம் என்று அந்த அறிக்கையில் கூறப்பட்டுள்ளது.

ஒரு வருட ஃபெல்லோஷிப்பின் முடிவில், பங்கேற்பாளா்கள் நிறைவுச் சான்றிதழைப் பெறுவாா்கள்.

இளைஞா்கள் நேரடியாக அரசுடன் ஈடுபடுவதற்கும் மாற்றத்தின் முகவா்களாக மாறுவதற்கும் ஒரு வலுவான தளமாக இந்தத் திட்டம் இருக்கும் என்று விவரித்த ரேகா குப்தா, தில்லி அரசு தலைநகரின் பாரம்பரியத்தையும் கலாசாரத்தையும் உலகளாவிய அடையாளத்தை வழங்குவதில் தனது இளைஞா்களின் ஆற்றலை மாற்றுவதில் உறுதியாக உள்ளது என்றாா் முதல்வா்.