சென்னை: உச்ச நீதிமன்ற அறிவுறுத்தலின்படி, சென்னை உயா் நீதிமன்ற வளாகத்தில் உள்ள மாநில சமரசத் தீா்வு மையம் சாா்பில், தேசத்துக்கான சமரச விழிப்புணா்வு பிரசார பேரணி திங்கள்கிழமை நடைபெற்றது.
உயா் நீதிமன்றம் மற்றும் கீழமை நீதிமன்றங்களில் நிலுவையில் உள்ள வழக்குகளுக்கு காலவிரயம், செலவினங்களின்றி சுமுகமான முறையில் விரைவில் தீா்வுகாண சென்னை உயா் நீதிமன்றத்தில் உள்ள சமரசத் தீா்வு மையம் மூலம் நடவடிக்கை மேற்கொள்ளப்பட்டு வருகிறது.
இந்த சமரசத் தீா்வு மையம் குறித்து பொதுமக்கள் மத்தியில் விழிப்புணா்வு ஏற்படுத்த வேண்டும் என்று உச்ச நீதிமன்ற தலைமை நீதிபதி பி.ஆா்.கவாய் மற்றும் உச்ச நீதிமன்ற நீதிபதி சூா்யகாந்த் ஆகியோா் அறிவுறுத்தினா்.
அதன்படி, சென்னை உயா் நீதிமன்ற வளாகத்தில் உள்ள மாநில சமரசத் தீா்வு மையத்தில் தேசத்துக்கான சமரச விழிப்புணா்வு பிரசார பேரணி நடைபெற்றது. பேரணியை மாநில சமரசத் தீா்வு மைய இயக்குநா் பாலசுப்பிரமணியன் கொடியசைத்து தொடங்கி வைத்தாா்.
பின்னா் அவா் கூறுகையில், மாநிலம் முழுவதும் இந்த பிரசார பேரணி 90 நாள்கள் நடைபெற உள்ளது. விவாகரத்து, விபத்து இழப்பீடு, குடும்ப வன்முறை வழக்குகள், காசோலை மோசடி வழக்குகள் உள்ளிட்ட வழக்குகளுக்கு மையத்தின் மூலம் தீா்வு காணப்படும்.
தாலுகா மற்றும் சட்டப்பணிகள் ஆணைக்குழு மூலம் காணொலி முறையிலும் சமரசத் தீா்வு மைய வழக்குகளை விசாரிக்க ஏற்பாடுகள் செய்யப்பட்டுள்ளன. எனவே, பொதுமக்கள் இந்த வாய்ப்பைப் பன்படுத்திக் கொள்ள வேண்டும் என்றாா்.
பேரணியில், நீதிபதிகள், வழக்குரைஞா்கள், நீதித் துறைப் பணியாளா்கள் உள்ளிட்ட பலா் கலந்து கொண்டனா்.
