கடலூர்: நடைப்பயிற்சியில் ஈடுபட்டிருந்த 80 வயது பெண் பாலியல் வன்கொடுமை செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது.
கடலூர் மாவட்டத்தில் திருட்டு வழக்கில் கைதாகி கடந்த சனிக்கிழமை விடுதலையான 23 வயது இளைஞர் ஒருவர், திங்கள்கிழமை(ஜூன் 16) மாலை நடைப்பயிற்சியில் ஈடுபட்டிருந்த 80 வயது மூதாட்டியை பாலியல் வன்கொடுமை செய்தார். சம்பவத்தன்று அந்த இளைஞர் போதையில் இருந்தது உறுதி செய்யப்பட்டுள்ளது.
இது குறித்த தகவலறிந்த உடனே சம்பவ இடத்துக்கு விரைந்து சென்று குற்றவாளியை பிடிக்க முயன்ற காவல்துறை அதிகாரிகளை போதையில் இருந்த வாலிபர் கத்தியைக் காட்டி மிரட்டியதுடன் அவர்களை தாக்கியும் உள்ளார். இதையடுத்து, அந்த வாலிபரை போலீஸார் துப்பாக்கியால் காலில் சுட்டுப் பிடித்துள்ளனர். இந்த சம்பவம் கடலூர் மாவட்டத்தில் பெரும் பரபரப்பை ஏற்படுத்தியுள்ளது.
பாதிக்கப்பட்ட பெண்மணிக்கு மருத்துவ சிகிச்சையளிக்கப்பட்டுள்ளதுடன் அவருக்கு தேவையான மனநல ஆலோசனைகளும் வழங்கப்பட்டு வருவதாக அதிகாரிகள் தெரிவித்தனர். இச்சம்பவம் தொடர்பாக வழக்குப்பதிந்து விசாரணை மேற்கொள்ளப்பட்டு வருகிறது.
