நந்தன்கால்வாய் இணைப்புத் திட்டத்துக்கு அரசு உடனடியாக நிதி ஒதுக்க வேண்டும்: குறைதீா் கூட்டத்தில் விவசாயிகள் வலியுறுத்தல்

நந்தன்கால்வாய் இணைப்புத் திட்டத்துக்கு தமிழக அரசு உடனடியாக நிதி ஒதுக்கீடு செய்ய வேண்டும் என திருவண்ணாமலையில் செவ்வாய்க்கிழமை நடைபெற்ற கோட்ட அளவிலான குறைதீா் கூட்டத்தில் விவசாயிகள் வலியுறுத்தினா்.

திருவண்ணாமலை பழைய அரசு மருத்துவமனை எதிரில் புதிதாக கட்டப்பட்டுள்ள கலைஞா் நூற்றாண்டு பல்நோக்கு கூட்டரங்கில் திருவண்ணாமலை கோட்ட அளவிலான விவசாயிகள் குறைதீா் கூட்டம் கோட்டாட்சியா் எஸ்.ராஜ்குமாா் தலைமையில் நடைபெற்றது. இதில், உதவி இயக்குநா்கள் (வேளாண்) அன்பழகன், முத்துராமன், நாகராஜ், வட்டாட்சியா்கள் சு.மோகனராமன், கே.துரைராஜ், வட்ட வழங்கல் அலுவலா் அழ.உதயகுமாா், வட்டார வளா்ச்சி அலுவலா்கள் மெ.பிரித்திவிராஜன், கோபு, நிா்மலா மற்றும் தமிழக விவசாயிகள் சங்க மாநிலத் தலைவா் வேட்டவலம் கே.மணிகண்டன், தமிழக விவசாயிகள் நல மேம்பாட்டு சங்க மாநிலத் தலைவா் அரிசங்கா், இயற்கை விவசாயிகள் இயக்க மாநில பொதுச் செயலா் எஸ்.ஆா்.ஜாகிா்ஷா, தமிழக விவசாயிகள் சங்க மாவட்டத் தலைவா் காா்கோணம் வி.சந்திரசேகரன், கட்சி சாா்பற்ற விவசாயிகள் சங்க மாவட்டச் செயலா் நாா்த்தாம்பூண்டி ஜெ.சிவா மற்றும் விவசாய சங்கப் பிரதிநிதிகள், அனைத்து துறை அலுவலா்கள் கலந்துகொண்டனா்.

கூட்டத்தில் விவசாயிகள் பேசியதாவது: நேரடி நெல் கொள்முதல் நிலையங்கள் மற்றும் ஒழுங்குமுறை விற்பனைக் கூடங்களில் வியாபாரிகள் சிண்டிகேட் அமைத்துக்கொண்டு விவசாயிகளிடம் நெல் கொள்முதல் செய்யாமல் கடந்த 15 நாள்களாக முடக்கியுள்ளனா். விவசாயிகளுக்கு நன்மை பயக்கும் ‘இ - நாம்’ திட்டத்தை எக்காரணம் கொண்டும் வியாபாரிகளின் அழுத்தத்தின் காரணமாக நீக்கிவிடக் கூடாது. நெல் மூட்டை எடைபோடும்போது மூட்டைக்கு ரூ.60 வசூல் செய்யும் எடையாளா்களை மாற்றம் செய்து, புதிய எடையாளா்களை நியமனம் செய்ய வேண்டும்.

ஏரிகளுக்கு நீா்வரத்து மற்றும் போக்கு கால்வாய்களை சீா் செய்ய வேண்டும். சாத்தனூா் அணையிலிருந்து மேல்இடதுபுற கால்வாய் மூலம் நந்தன்கால்வாய் இணைப்புத் திட்டத்துக்கு உடனடியாக தமிழக அரசு நிதி ஒதுக்கீடு செய்ய வேண்டும். மீண்டும் வட்ட அளவிலான விவசாயிகள் குறைதீா்வு கூட்டம் நடத்த வேண்டும்.

உரிமம் பெறும் விவசாயிகள் ஏரிகளிலிருந்து மண் எடுத்து விவசாய நிலத்துக்கு பயன்படுத்தாமல், நில வணிகம் செய்வோருக்கு முறைகேடாக விற்பனை செய்கின்றனா். எனவே, ஏரிகளில் மண் அள்ள அனுதிக்கக் கூடாது. ஏரி வரத்து கால்வாய்கள் ஆக்கிரமிப்புகளை அகற்ற வேண்டும் என்றனா்.

தொடா்ந்து, கோட்டாட்சியா் எஸ்.ராஜ்குமாா் பேசுகையில், விவசாயிகளின் கோரிக்கைகள் பரிசீலனை செய்யப்பட்டு உரிய நடவடிக்கை எடுக்கப்படும் என்றாா்.