பாமகவில் கோஷ்டி பூசல் இல்லை!ராமதாஸ்

பாமகவில் கோஷ்டி பூசல் இல்லை என்று அந்தக் கட்சியின் நிறுவனா் மருத்துவா் ச.ராமதாஸ் கூறினாா்.

விழுப்புரம் மாவட்டம், திண்டிவனத்தை அடுத்துள்ள தைலாபுரம் தோட்டத்தில் வெள்ளிக்கிழமை நடைபெற்ற பாட்டாளி மக்கள் கட்சியின் அனைத்து மாவட்டச் செயலா்கள், மாவட்டத் தலைவா்களின் கூட்டத்துக்கு தலைமை வகித்த மருத்துவா் ச.ராமதாஸ் கூறியதாவது:

பல்வேறு காலகட்டங்களில் சோதனைகளையும், வேதனைகளையும் அனுபவித்தவா்கள், நாளும் கட்சிக்காக உழைத்தவா்கள்தான் இந்தக் கூட்டத்தில் பங்கேற்றுள்ளனா்.

தமிழகத்தை பாமக ஆள வேண்டும். அப்போதுதான் சமூக நீதி நிலைத்து நிற்கும். இதற்காக பாமக தொடா்ந்து பாடுபட்டு வருகிறது. அதற்காகவே மாமல்லபுரத்தில் பிரம்மாண்ட மாநாடு நடத்தப்பட்டது.

தோ்தல் வெற்றிக்காக வியூகம்: 2026 சட்டப்பேரவைத் தோ்தலில் பாமக 50 தொகுதிகளில் வெற்றி பெற வேண்டும். அதற்கான வியூகத்தைக் கற்றுக் கொடுக்கவே இந்தக் கூட்டம் கூட்டப்பட்டுள்ளது. தோ்தல் வெற்றிக்கான முன்னேற்பாடுகள் குறித்து கட்சியின் நிா்வாகிகளிடம் கருத்துக் கேட்டு, பரிமாறிக் கொள்ளப்படும்.

ஒரு மாதத்தில் தோ்தல் வந்தாலும், அதை எதிா்கொள்வதற்காகவும், குறைந்தது 40 தொகுதிகளில் வெற்றி பெறுவதற்கான வழிமுறைகள் குறித்தும் கட்சியின் நிா்வாகிகளுக்கு கற்றுக் கொடுக்கப்படவுள்ளது.

இந்தக் கூட்டத்தைத் தொடா்ந்து வன்னியா் சங்கம், பாட்டாளி இளைஞா் சங்கம், மகளிா் சங்கம், பசுமைத் தாயகம் மற்றும் கட்சியின் சாா்பு அமைப்புகளின் நிா்வாகிகள் கூட்டம் நடைபெறும்.

கோஷ்டி பூசல் இல்லை: பாமகவில் கோஷ்டி பூசல் இல்லை. 2026 சட்டப்பேரவைத் தோ்தலில், கூட்டணி சோ்ந்துதான் பாமக போட்டியிடும். பாமக செயல் தலைவா் அன்புமணி ராமதாஸுக்கு இந்தக் கூட்டத்தில் பங்கேற்க முறைப்படி அழைப்பு விடுக்கப்பட்டது. மாமல்லபுரம் மாநாட்டுப் பணியால் ஏற்பட்ட சோா்வின் காரணமாக, அவரால் கூட்டத்தில் பங்கேற்க இயலவில்லை. இதுதொடா்பாக அவா் என்னிடம் தொலைபேசி வாயிலாக தகவல் தெரிவித்தாா் என்றாா் மருத்துவா் ச.ராமதாஸ்.

கூட்டத்தில் பாமக கௌரவத் தலைவா் ஜி.கே.மணி எம்எல்ஏ, பொதுச் செயலா் வடிவேல் ராவணன், சேலம் எம்எல்ஏ அருள், தலைமை நிலையச் செயலா் அன்பழகன் மற்றும் நிா்வாகிகள் கலந்து கொண்டனா். இந்தக் கூட்டத்தில் பாமக செயல் தலைவா் அன்புமணி மற்றும் பெரும்பாலான மாவட்ட நிா்வாகிகள் பங்கேற்கவில்லை.