பாலியல் வன்கொடுமை செய்து மாணவி கொலை: ஓட்டுருக்கு ஆயுள்

ஆம்பூா் அருகே கல்லூரி மாணவியை கடத்தி சென்று பாலியல் வன்கொடுமை செய்து கொலை செய்த ஆட்டோ ஓட்டுநருக்கு ஆயுள் தண்டனை விதித்து திருப்பத்தூா் மாவட்ட நீதிமன்றம் தீா்ப்பளித்தது.

ஆம்பூா் அருகே மின்னூரை சோ்ந்த ராமனின் மகன் சக்திவேல்(25). ஆட்டோ ஓட்டுநா். இவரும் அதே பகுதியை சோ்ந்த 19 வயதான கல்லூரி மாணவியும் காதலித்தனா்.

இந்தநிலையில் கடந்த 7.11.2014 அன்று மாணவி தான் படித்து வரும் வாணியம்பாடி கல்லூரியில் நின்று கொண்டு இருந்தாா். அப்போது அங்கு வந்த சக்திவேல், மாணவியை வீட்டுக்கு கொண்டு சென்று விடுவதாக கூறினாா். இதைத் தொடா்ந்து மாணவியும் சக்திவேலின் ஆட்டோவில் ஏறி சென்றாா்.

மின்னூா் டான்சி தோல் தொழிற்சாலை பகுதியில் வந்தபோது சக்திவேல், மாணவியிடம் சிறிதுநேரம் பேசிவிட்டு செல்லலாம் என மாணவியை அந்த பகுதியில் உள்ள மறைவான இடத்துக்கு அழைத்து சென்று பாலியல் பலாத்காரம் செய்தாராம். அதைத்தொடா்ந்து மாணவி இந்த சம்பவம் குறித்து காவல் நிலையத்தில் புகாா் அளிக்கப்போவதாக கூறினாா்.

இதனால் தனக்கு பிரச்னை ஏற்படும் என கருதிய சக்திவேல் மாணவியிடம் தகராறு செய்துள்ளாா். அப்போது ஆத்திரமடைந்த சக்திவேல் மாணவியை அங்கு கிடந்த கட்டையை எடுத்து பலமாக தாக்கினாா். இதில் மாணவி பலத்த காயமடைந்தாா். அதைத்தொடா்ந்து சக்திவேல் தனது நண்பரை அழைத்து ஆட்டோ விபத்தில் சிக்கிவிட்டதாகவும், விபத்தில் தன்னுடன் வந்த மாணவி காயமடைந்து விட்டதாகவும் கூறி ஆம்பூரில் உள்ள தனியாா் மருத்துவமனையில் சிகிச்சைக்காக சோ்த்தனா்.

பின்னா் மேல்சிகிச்சைக்காக மாணவியை வேலூரில் உள்ள தனியாா் மருத்துவமனையில் சிகிச்சைக்காக சோ்த்தாா். அங்கு சிகிச்சை பெற்ற மாணவி 8.11.2014 அன்று உயிரிழந்தாா். இதுகுறித்து ஆம்பூா் கிராமிய போலீஸாா் விபத்து என வழக்குப்பதிவு செய்தனா். மேலும் கடந்த 12.11.2014 அன்று சக்திவேல் குடியாத்தம் நீதிமன்றத்தில் சரண் அடைந்தாா்.

இந்தநிலையில் பிரேத பரிசோதனை அறிக்கையில் மாணவி பாலியல் பலாத்காரம் செய்யப்பட்டு, அடித்து கொலை செய்யப்பட்டு இருப்பது தெரியவந்தது. இதையடுத்து போலீசாா் கொலை வழக்காக மாற்றி சக்திவேலை கைது செய்தனா். இந்த வழக்கு திருப்பத்தூா் மாவட்ட முதன்மை அமா்வு நீதிமன்றத்தில் நடைபெற்று விசாரணை முடிந்து தீா்ப்பு கூறப்பட்டது.

மாணவியை கடத்தியதற்காக 7 ஆண்டுகள், ரூ.5,000 அபராதமும், கட்டத் தவறினால் 1 ஆண்டும், பலாத்காரம் செய்ததற்கு 10 ஆண்டுகள்,, ரூ.5,000 அபராதமும், கட்டத் தவறினால் 1 ஆண்டும், கொலை செய்ததற்காக ஆயுள் தண்டனையும், ரூ.20,000 அபராதமும், தடயத்தை மறைத்ததற்காக 3 ஆண்டுகள், ரூ.5,000 அபராதமும், கட்டத் தவறினால் 6 மாத சிறை தண்டனையும், அனைத்தையும் ஏக காலத்தில் அனுபவிக்க வேண்டும் என நீதிபதி மீனாகுமாரி தீா்ப்பளித்தாா். மாணவியின் குடும்பத்துக்கு இழப்பீடாக ரூ.2 லட்சத்தை அரசு வழங்கப்பவும் உத்தரவிட்டாா். அரசுத் தரப்பில் பி.டி.சரவணன் ஆஜரானாா்.