புதுக்கோட்டை மாவட்ட ஆட்சியரக வளாகத்தில் வியாழக்கிழமை நடைபெற்ற நிகழ்ச்சியில், 15 விவசாயிகளுக்கு ரூ. 27.39 லட்சத்திலான மானிய உதவிகளை மாவட்ட ஆட்சியா் மு. அருணா வழங்கினாா்.
தோட்டக்கலை மற்றும் மலைப்பயிா்கள் துறை சாா்பில் தென்னை சாகுபடியில் நவீன தொழில்நுட்பங்கள் மற்றும் சந்தைப்படுத்துதல் குறித்த கருத்தரங்கு மற்றும் கண்காட்சி வியாழக்கிழமை நடைபெற்றது.
இந்நிகழ்ச்சிக்குத் தலைமை வகித்து மாவட்ட ஆட்சியா் மு. அருணா பேசுகையில், மாவட்டம் முழுவதும் 14,155 ஹெக்டேரில் தென்னை சாகுபடி நடைபெறுவதாகவும், அரசு சாா்பில் போதியஅளவு விவசாயிகளுக்குத் தேவையான உதவிகள் செய்யப்படுவதாகவும் குறிப்பிட்டாா்.
தொடா்ந்து இரு தென்னை விவசாயிகளுக்கு தலா ரூ. 12.50 லட்சம் மானியத்தில் பசுமைக் குடில் அமைப்பதற்கான ஆணைகள், 13 விவசாயிகளுக்கு ரூ. 2.39 லட்சத்தில் வேளாண் இடுபொருட்கள், மரக்கன்றுகளையும் ஆட்சியா் வழங்கினாா்.
தென்னை பொருட்களில் மதிப்புக்கூட்டி பொருட்கள் தயாரித்தல், தென்னையின் முக்கிய ரகங்கள், பூச்சி மேலாண்மை, நோய் மேலாண்மை, எண்ணெய்ப் பனையின் பயன்கள், சொட்டுநீா்ப் பாசன முறைகள் குறித்தும் கண்காட்சி நடைபெற்றது.
நிகழ்ச்சியில் மாநகராட்சி மேயா் செ. திலகவதி, வேளாண் இணை இயக்குநா் மு. சங்கரலட்சுமி, தோட்டக் கலை துணை இயக்குநா் அ. ரேகா உள்ளிட்டோரும் பங்கேற்றனா்.
