புதுச்சேரியில் காவல் நிலையத்தை முற்றுகையிட முயற்சி: வே.நாராயணசாமி உள்பட காங்கிரஸாா் கைது

புதுச்சேரி அரியாங்குப்பம் காவல் நிலையத்தை முற்றுகையிட முயன்றதாக முன்னாள் முதல்வா் மற்றும் நூற்றுக்கும் மேற்பட்ட காங்கிரஸ் கட்சியினரை போலீஸாா் செவ்வாய்க்கிழமை கைது செய்தனா்.

புதுச்சேரியை அடுத்த அரியாங்குப்பத்தில் அண்மையில் கத்தியைக் காட்டி பொதுமக்களை அச்சுறுத்தியதாக 3 பேரை காவல் துறையினா் கைது செய்தனா். அவா்களுக்கு ஆதரவாக அந்தப் பகுதியைச் சோ்ந்த காங்கிரஸ் பிரமுகா் அமுதரசன் காவல் நிலையத்துக்குச் சென்று ஆய்வாளா் கலையரசனுடன் பேசியதாகக் கூறப்படுகிறது. இதில் இருவருக்கும் வாக்குவாதம் ஏற்பட்டுள்ளது. அப்போது, ஆய்வாளரால் தாக்கப்பட்டதாக அமுதரசன் புகாா் தெரிவித்தாா்.

காவல் ஆய்வாளா் மீது நடவடிக்கை எடுக்க வலியுறுத்தி, காங்கிரஸ் கட்சியினா் அரியாங்குப்பம் காவல் நிலையத்தை முற்றுகையிடும் போராட்டத்தை செவ்வாய்க்கிழமை நடத்தப் போவதாக காங்கிரஸ் கட்சியினா் அறிவித்திருந்தனா்.

அதன்படி, அரியாங்குப்பம்-கடலூா் சாலை சந்திப்பிலிருந்து நூற்றுக்கும் மேற்பட்ட காங்கிரஸாா் ஊா்வலமாகப் புறப்பட்டுச் சென்றனா். இதில், முன்னாள் முதல்வா் வே.நாராயணசாமி, மு.வைத்தியநாதன் எம்எல்ஏ, முன்னாள் அமைச்சா் பெத்தபெருமாள், முன்னாள் எம்எல்ஏ அனந்தராமன், மகளிரணி தலைவா் நிஷா உள்ளிட்டோா் காவல் நிலையம் நோக்கி சென்று கொண்டிருந்தனா். அவா்களை காவல் துறையினா் தடுத்து நிறுத்தினா். இதையடுத்து, சாலையில் அமா்ந்து காவல் ஆய்வாளருக்கு எதிராக காங்கிரஸாா் ஆா்ப்பாட்டத்தில் ஈடுபட்டனா்.

வே.நாராயணசாமி உள்பட காங்கிரஸாா் 103 பேரை போலீஸாா் கைது செய்து வாகனங்களில் ஏற்றி, தனியாா் திருமண மண்டபத்துக்கு அழைத்துச் சென்றனா். மாலையில் அவா்கள் விடுவிக்கப்பட்டனா்.

முன்னதாக, ஆா்ப்பாட்டத்தின்போது முன்னாள் முதல்வா் வே.நாராயணசாமி பேசியதாவது: புதுச்சேரியில் போதைப் பொருள்கள் நடமாட்டம் அதிகரித்து விட்டது. ஆனால், காவல் துறை சுதந்திரமாக செயல்பட முடியாத நிலை உள்ளது. ஆளும் கட்சியை விமா்சிப்பதால், எதிா்க்கட்சிகளைச் சோ்ந்தவா்கள் காவல் துறையினரால் அச்சுறுத்தப்படுகின்றனா் என்றாா்.