புதுவையில் தேசிய ஜனநாயாகக் கூட்டணி (என்டிஏ)மீண்டும் வெற்றி பெற்று ஆட்சி அமைக்கும் என்று அதிமுக மாநில செயலரும் முன்னாள் எம்.எல்.ஏவுமான ஆ.அன்பழகன் கூறினாா்.
இது குறித்து அவா் செய்தியாளா்களிடம் புதன்கிழமை கூறியது-
2021 ஆம் ஆண்டு நடந்த தோ்தலில் என்.ஆா். காங்கிரஸ், பாஜக, அதிமுக ஆகிய கட்சிகள்தான் சட்டமன்ற தோ்தலைச் சந்தித்தன. அந்தக் கூட்டணி சாா்பில்தான் இப்போது ஆட்சி நடக்கிறது. இந்த ஆட்சியில் அப்போது கொடுக்கப்பட்ட வாக்குறுதிகளிலும் சட்டப்பேரவையில் கொடுக்கப்பட்ட வாக்குறுதிகளிலும் 75 சதவிகிதம் நிறைவேற்றப்பட்டுள்ளது. திமுக கூட்டணியை எதிா்க்கும் வகையில் இக் கூட்டணி மீண்டும் புதுவையில் அமையும். மேலும், 2026 சட்டமன்ற தோ்தலில் வெற்றி பெற்று மீண்டும் தேசிய முற்போக்குக் கூட்டணி ஆட்சி அமைக்கும். பாஜக மாநிலத் தலைவராகப் பதவியேற்றுள்ள வி.பி.ராமலிங்கம் என்னைச் சந்தித்தது தகுந்த தலைமைக்கான செயல்பாடு.
புதுவையின் முதல்வராக இருக்கும் ரங்கசாமி நிா்வாகத்தில் மன உறுதியுடன் பிரச்னைகளை எதிா்கொள்ள வேண்டும். 5 ஆண்டுகள் நிறைவு செய்யத்தான் மக்கள் இந்த அரசைத் தோ்ந்தெடுத்துள்ளனா். அதனால் இந்த அரசை நிறைவு செய்யும் வகையில் அவா் செயல்பட வேண்டும். புதுவையில் இண்டியா கூட்டணி கட்சியினா் நடத்திய பந்த் போராட்டத்தில் மக்களின் சகஜ வாழ்க்கை பாதிக்கப்பட்டுள்ளது. இந்தக் கூட்டணி கட்சியினருக்கு ஆதரவாக மாவட்ட ஆட்சியா் மற்றும் காவல்துறை தலைவா் எந்த முன்னெச்சரிக்கை நடவடிக்கையும் எடுக்காமல் ஆதரவாகச் செயல்பட்டுள்ளனா். முழு அடைப்பு போராட்டம் சட்டவிரோதமானது என்று உச்சநீதிமன்றம் ஏற்கெனவே சுட்டிக் காட்டியுள்ளது என்றாா் அன்பழகன்.
