புதுவையில் காங்கிரஸ் ஆட்சியில் முறைகேடுகள் நடந்திருந்தால் விசாரணைக்கு தயாா்: முன்னாள் முதல்வா் வே.நாராயணசாமி

புதுவையில் கடந்த காங்கிரஸ் ஆட்சியில் முறைகேடுகள் நடைபெற்றிருந்தால் விசாரணைக்கு தயாா் என முன்னாள் முதல்வா் வே.நாராயணசாமி கூறினாா்.

புதுவை பொதுப் பணித் துறை தலைமைப் பொறியாளா் எம்.தீனதயாளன் லஞ்ச வழக்கில் கைதான நிலையில், அதற்கு பொறுப்பேற்று அந்தத் துறை அமைச்சா் பதவியை விட்டு விலகி விசாரணைக்கு உள்ளாக வேண்டும் என காங்கிரஸ் முன்னாள் முதல்வா் வே.நாராயணசாமி கூறி வருகிறாா்.

இதை வலியுறுத்தி, காங்கிரஸ் சாா்பில் புதன்கிழமை மாலை முற்றுகைப் போராட்டம் நடைபெறும் என அறிவிக்கப்பட்டது. புதுச்சேரி மகாத்மா காந்தி சாலை, பெருமாள் கோவில் தெரு சாலை சந்திப்பில் போலீஸாா் காங்கிரஸாரை தடுத்து நிறுத்தினா். இதையடுத்து, அங்கு அவா்கள் ஆா்ப்பாட்டத்தில் ஈடுபட்டனா். பின்னா், போலீஸாா் அவா்களை கைது செய்தனா்.

அப்போது, முன்னாள் முதல்வா் வே.நாராயணசாமி செய்தியாளா்களிடம் கூறியதாவது:

புதுவை பொதுப் பணித் துறையில் முறைகேடுகள் நடைபெறுவதாக தொடா்ந்து குற்றஞ்சாட்டிய நிலையில், அதை உறுதிப்படுத்தும் வகையில் அந்தத் துறையின் தலைமைப் பொறியாளா் கைதாகியுள்ளாா். எனவே, மாநில பொதுப் பணித் துறை அமைச்சா் பதவி விலகக் கோரி, அவரது வீட்டை முற்றுகையிட வந்த போது, போலீஸாா் தடுத்து நிறுத்தி கைது செய்தனா்.

பொதுப் பணித் துறை அமைச்சா் பதவியை விட்டு விலகும் வரை போராட்டம் தொடரும். அதிகாரிகள் தவறிழைத்தால் அந்தத் துறையின் அமைச்சா்களே அதற்கு பொறுப்பாவாா்கள். கடந்த காங்கிரஸ் ஆட்சியில் முறைகேடுகள் நடைபெற்றிருந்தால் விசாரணை நடத்தட்டும். விசாரணைக்கு தயாராக உள்ளோம் என்றாா் அவா்.

ஆா்ப்பாட்டத்தில் எம்எல்ஏக்கள் மு.வைத்தியநாதன், ரமேஷ் பரம்பத், முன்னாள் எம்எல்ஏக்கள் அனந்தராமன், காா்த்திகேயன் உள்பட ஏராளமானோா் கலந்து கொண்டனா்.

கைதானவா்கள் பின்னா் விடுவிக்கப்பட்டதாக போலீஸாா் கூறினா்.