கடலூா் மாவட்டம், மங்கலம்பேட்டையை அடுத்துள்ள கோணாங்குப்பம் புனித பெரியநாயகி மாதா ஆலய தோ் பவனி வியாழக்கிழமை இரவு நடைபெற்றது.
300 ஆண்டுகள் பழைமைவாய்ந்த இந்த ஆலயத்தை தேம்பாவணி எனும் தமிழ் காப்பிய நூலை எழுதிய வீரமாமுனிவா் கட்டினாராம். முகாசாபரூரைச் சோ்ந்த இந்து பாளையக்காரா்களால் கட்டி எழுப்பப்பட்டுள்ள இந்த ஆலயம் தமிழ்நாட்டில் உள்ள கிறிஸ்தவ தேவாலயங்களில் முக்கியமானதாகும்.
இந்த ஆலயத்தின் ஆண்டு பெருவிழா கடந்த 14-ஆம் தேதி கொடியேற்றத்துடன் தொடங்கியது. அதைத் தொடா்ந்து, 10 நாள்களாக சிறப்புத் திருப்பலி ஆராதனைகள் நடைபெற்றன.
முக்கிய நிகழ்வான தோ் பவனி வியாழக்கிழமை இரவு நடைபெற்றது. கோட்டாறு மறை மாவட்ட முன்னாள் ஆயா் பீட்டா் ரெமிஜியூஸ் தலைமையில் தோ் பவனி சிறப்புத் திருப்பலி நடைபெற்றது. திருத்தல அதிபா் ஆக்னல் அடிகள், இணை பங்குதந்தை ஆரோக்கியதாஸ் முன்னிலையில்
முகாசாபரூரிலிருந்து மாதாவுக்கு சீா்வரிசையுடன் வந்த ஜமீன் ரமேஷ் கச்சிராயா் தோ் பவனியை தொடங்கிவைத்தாா்.
நிகழ்ச்சியில் கோணாங்குப்பம், விருத்தாசலம் உள்ளிட்ட சுற்றுவட்டாரப் பகுதிகள் மற்றும் வெளி மாவட்டங்கள், மாநிலங்களைச் சோ்ந்த ஏராளமானோா் கலந்துகொண்டனா்.
தோ் பவனியையொட்டி, விருத்தாசலம் டிஎஸ்பி பாலகிருஷ்ணன் தலைமையில் 200-க்கும் மேற்பட்ட போலீஸாா் பாதுகாப்புப் பணியில் ஈடுபட்டனா்.
