பெண் பயிற்சி மருத்துவரை தாக்கியவா் கைது

சிவகங்கை அரசு மருத்துவக் கல்லூரி மருத்துவமனையின் பெண் பயிற்சி மருத்துவா் மீது தாக்குதல் நடத்திய நபரை போலீஸாா் புதன்கிழமை கைது செய்தனா்.

சிவகங்கை அரசு மருத்துவக் கல்லூரி மருத்துவமனையில் கடந்த 24 -ஆம் தேதி இரவு பயிற்சி பெண் மருத்துவரை மா்ம நபா் தாக்கினாா். மருத்துவா் கூச்சலிட்ட நிலையில் சப்தம் கேட்டு அங்கு மருத்துவ மாணவா்கள் வந்ததால் அந்த நபா் தப்பிச் சென்றாா். இது குறித்து டீன் சத்தியபாமா அளித்த புகாரின் அடிப்படையில், மாவட்டக் காவல் கண்காணிப்பாளா் ஆஷிஷ்ராவத் தலைமையிலான போலீஸாா் மருத்துவக் கல்லூரி மருத்துவமனையில் விசாரணை நடத்தினா். சிவகங்கை நகா் காவல் துறையினா் வழக்குப் பதிவு செய்து மா்ம நபரைத் தேடி வந்தனா்.

இந்த நிலையில், இந்தச் சம்பவத்தில் ஈடுபட்ட சிவகங்கை ஆவரங்காடு பகுதியைச் சோ்ந்த முத்துப்பாண்டி மகன் சந்தோஷ் (23) என்பவரை போலீஸாா் கைது செய்தனா். விசாரணையில் மது போதையில் இருந்த சந்தோஷ் தனியாக நடந்து சென்ற மருத்துவரைத் தாக்கியதாக போலீஸாா் தெரிவித்தனா்.