பேரூா் வட்டத்தில் அனுமதியின்றி மண் தோண்டும் இயந்திரங்கள் பயன்படுத்தினால் பறிமுதல் செய்யப்படும்: ஆட்சியா் எச்சரிக்கை

கோவை மாவட்டம், பேரூா் வட்டத்தில் மலையிட பாதுகாப்புக் குழும எல்லையில் மண் தோண்டும் இயந்திரங்களை அனுமதியின்றி பயன்படுத்தக் கூடாது என்று ஆட்சியா் கிராந்திகுமாா் பாடி எச்சரித்துள்ளாா்.

இதுகுறித்து அவா் வெளியிட்டுள்ள செய்திக்குறிப்பில் கூறியிருப்பதாவது:

வீட்டு வசதி, நகா்ப்புற வளா்ச்சித் துறை அரசாணை எண் 49-ன் படி, பேரூா் வட்டத்துக்குள்பட்ட நரசீபுரம், வெள்ளிமலைப்பட்டணம், தேவராயபுரம், கலிக்கநாயக்கன்பாளையம், இக்கரைப் போளுவாம்பட்டி, மத்வராயபுரம், ஆலாந்துறை, பூலுவப்பட்டி, தென்கரை, மாதம்பட்டி, தீத்திபாளையம், பேரூா் செட்டிபாளையம், சுண்டக்காமுத்தூா், எட்டிமடை, மாவுத்தம்பதி, தொண்டாமுத்தூா் ஆகிய கிராமங்கள் மலையிட பாதுகாப்புக் குழும கிராமப் பகுதிகளாக வரையறுக்கப்பட்டுள்ளன.

மேற்படி கிராமங்களில் தொழிற்சாலை அமைப்பது, கட்டுமானப் பணிகள் மேற்கொள்வது, நில அமைப்பை மாற்றுவது தொடா்பான பணிகளுக்கு மலையிட பாதுகாப்புக் குழுமத்தின் அனுமதி பெறுவது கட்டாயமாகும். இதை மீறுவது சட்டப்படி குற்றமாகும்.

எனவே, பேரூா் வட்டத்தில் உள்ள மலையிட பாதுகாப்புக் குழும கிராமங்களில் கனரக வாகனங்களைப் பயன்படுத்தி நடைபெறும் அனைத்து செயல்பாடுகளுக்கும் வட்டாட்சியரின் அனுமதியைப் பெறுவது கட்டாயமாகும்.

மேலும், பேரூா் வட்டத்துக்குள்பட்ட பகுதியில் மண் வெட்டியெடுக்க பயன்படுத்தப்படும் கனகர இயந்திரங்களான பொக்லைன், எக்ஸாவேட்டா் போன்ற வாகனங்கள் முறையாக பதிவு செய்யப்பட வேண்டும். பதிவு செய்யப்பட்ட வாகனங்களில் ஜிபிஎஸ் கருவி பொருத்துவது கட்டாயமாகும். இந்த விதிமுறைகளை முறையாகப் பின்பற்றத் தவறும் வாகனங்கள் பறிமுதல் செய்யப்பட்டு விதிகளின்படி உரிய நடவடிக்கை எடுக்கப்படும் என்று தெரிவித்துள்ளாா்.