முதுநிலைப் படிப்புகளில் சேர கியூட் நுழைவுத் தோ்வு எழுதியோா் விண்ணப்பிக்கலாம்: புதுவை மத்திய பல்கலைக்கழகம்

புதுவை மத்திய பல்கலைக்கழகத்தில் உள்ள முதுநிலைப் படிப்புகள் மற்றும் முதுநிலை டிப்ளமோ படிப்புகளுக்கு கியூட் (பிஜி) தோ்வு எழுதிய விண்ணப்பதாரா்களிடமிருந்து விண்ணப்பங்கள் வரவேற்கப்படுகின்றன.

இதுகுறித்து புதுவை மத்திய பல்கலைக்கழகப் பதிவாளா் அலுவலகம் வெளியிட்ட செய்திக்குறிப்பு: புதுவை மத்திய பல்கலைக்கழகத்தில் முதுநிலை படிப்புகள் (எம்.ஏ., எம்.எஸ்சி., எம்.காம்., எம்சிஏ, எம்.டெக். எம்பிஏ, எம்எல்ஐஎஸ், எம்.எட். எம்.பி.எட், எம்பிஏ, எல்எல்எம்) மற்றும் முதுநிலை டிப்ளமோ படிப்புகளில் சோ்வதற்கு கியூட் (பிஜி) நுழைவுத் தோ்வு எழுதியவா்கள் விண்ணப்பிக்கலாம்.

இந்த பாடப் பிரிவுகளுக்கு புதுவை மத்திய பல்கலைக்கழக இணையதளத்தில் விண்ணப்பிக்கலாம்.

பொதுப்பிரிவு, இதர பிற்படுத்தப்பட்டோா் (ஓபிசி), பொருளாதாரத்தில் பின்தங்கிய முற்பட்ட வகுப்பினா் (இடபிள்யூஎஸ்) ஆகிய பிரிவினா் விண்ணப்ப கட்டணமாக ரூ.250, ஒவ்வொரு கூடுதல் பாடப் பிரிவுக்கும் ரூ.100 எனக் கட்டணம் செலுத்த வேண்டும். தாழ்த்தப்பட்டோா் (எஸ்சி), பழங்குடியினா் (எஸ்டி) பிரிவினா் விண்ணப்ப கட்டணமாக ரூ 150, மற்றும் ஒவ்வொரு கூடுதல் பாடப்பிரிவுக்கு ரூ.50 கட்டணம் செலுத்த வேண்டும். மாற்றுத்திறனாளிகள், மூன்றாம் பாலினத்தவருக்கு விண்ணப்பம் மற்றும் பாடப்பிரிவுக்கு கட்டணம் கிடையாது.

விண்ணப்பதாரா்கள் ஆா்வமுள்ள படிப்புகளுக்கு தேவையான கியூட் (பிஜி) தகுதி அளவுகோல் மற்றும் தொடா்புடைய தோ்வு தாள்களுக்கு பல்கலைக்கழக இணையதளத்தில் கிடைக்கும் தகவல் சிற்றேட்டை பாா்க்கலாம்.

விண்ணப்பங்களை சமா்ப்பிக்க வரும் ஜூன் 13-ஆம் தேதி கடைசி நாளாகும். விண்ணப்பதாரா்கள் அண்மைத் தகவல்களுக்கு பல்கலைக்கழக இணையதளத்தை தவறாமல் பாா்வையிடலாம் எனக்குறிப்பிடப்பட்டுள்ளது.