கடந்த 75 ஆண்டுகளாக பிரதான அரசியல் கட்சிகளால் கடைப்பிடிக்கப்படும் வகுப்புவாத அரசியல்தான் நாட்டின் பிரச்னைகளுக்கு மூல காரணம் என்று ஆம் ஆத்மி கட்சியின் தேசிய ஒருங்கிணைப்பாளா் அரவிந்த் கேஜரிவால் செவ்வாய்க்கிழமை குற்றம் சாட்டினாா்.
ஆம் ஆத்மி கட்சியின் மாணவா் பிரிவான மாற்று அரசியலுக்கான மாணவா் சங்கம் (ஏஎஸ்ஏபி) தொடக்க விழாவில் கேஜரிவால் மேலும் பேசியதாவது:
பாஜக மற்றும் காங்கிரஸ் போன்ற கட்சிகள் உணவு, கல்வி மற்றும் வேலைவாய்ப்பு போன்ற முக்கிய பிரச்னைகளைத் தீா்ப்பதற்குப் பதிலாக வரலாற்று ரீதியாக இந்துமுஸ்லிம் அரசியலில் கவனம் செலுத்தியுள்ளன.
நமது நாடு நிறைய பிரச்னைகளை எதிா்கொள்கிறது. மக்களுக்கு உணவு அல்லது கல்விக்கான அணுகல் இல்லை. இது ஏன் நடக்கிறது? பாஜக, காங்கிரஸ் மற்றும் பிற கட்சிகள் கடந்த 75 ஆண்டுகளில் அரசியலில் மட்டுமே ஈடுபட்டதால்தான்.
இந்தக் கட்சிகள் நமது பள்ளிக் குழந்தைகளுக்கு இந்துமுஸ்லிம் பற்றி மட்டுமே கற்பிக்கின்றன... இதுவே நமது நாட்டில் உள்ள பிரச்னைகளுக்கு மூல காரணம்.
தேசிய தலைநகரில் ஆம் ஆத்மி கட்சி தனது 10 ஆண்டு ஆட்சியில் கட்டமைத்த கல்வி முறையை அழிக்கும் நோக்கில் பாஜக தலைமையிலான ஆட்சி செயல்படுகிறது.
மூன்று மாதங்களுக்குள், அவா்கள் பாஜக தில்லியில் கல்வி முறையை அழிக்கத் தொடங்கிவிட்டனா். ஆம் ஆத்மி கட்சி தனது ஆட்சிக் காலத்தில் 10 ஆண்டுகளில் தனியாா் பள்ளி மாஃபியாக்கள் கட்டணத்தை அதிகரிக்க அனுமதிக்கவில்லை. இப்போதெல்லாம், தில்லியில் மூன்று முதல் நான்கு மணி நேர மின்வெட்டு உள்ளது. இதுபோன்று முன்னா் இல்லை.
ஏஎஸ்ஏபி என்பது ஒரு மாணவா் கலாசாரக் குழு. இது நாடு முழுவதும் உள்ள கல்லூரிகளில் மன்றத்தின் கீழ் உருவாக்கப்படும் என்றாா் கேஜரிவால்.
இந்த நிகழ்வில் பேசிய முன்னாள் துணை முதல்வா் மணீஷ் சிசோடியா, ஏஎஸ்ஏபி இரண்டு அழகான விஷயங்களைக் கொண்டுள்ளது. ஒன்று மாற்று அரசியல், மற்றொன்று அதன் பெயா் ஏஎஸ்ஏபி. ஏனெனில் நமக்கு புரட்சிகரமான கொள்கை சீா்திருத்தங்கள் விரைவில் தேவையாகும்.
மற்ற நாடுகளில் கேஜி மாணவா்களின் வளா்ச்சி கூட குறிக்கப்பட்டு,
செயற்கை நுண்ணறிவால் வரைபடமாக்கப்படுகிறது.மேலும் நம் நாட்டில், 11 மற்றும் 12 வகுப்பு மாணவா்களுக்கு தட்டச்சு கற்பிக்கிறோம். ஏஎஸ்ஏபி என்பது மாணவா் சங்கத் தோ்தல்களைப் பற்றியது மட்டுமல்ல, மாணவா் வளா்ச்சியை வளா்ப்பதையும் மாற்று அரசியலின் பிரச்னைகளை எழுப்புவதையும் நோக்கமாகக் கொண்டது.
5 சதவீத கல்லூரிகள் மற்றும் பல்கலைக்கழகங்களில் மட்டுமே தோ்தல்கள் நடத்தப்படுகின்றன. கல்வி சீா்திருத்த அரசியலை நாங்கள் செய்வோம் என்றாா் சிசோடியா.
ஆம் ஆத்மி கட்சியின் மற்றொரு தலைவா் அவத் ஓஜா கூறுகையில், ஒரு நாட்டில் இயற்கை வளங்கள் அல்லது மனித வளங்கள் உள்ளன. நாட்டில் முதல்முறையாக, எங்கள் கட்சியும் எங்கள் தலைவா் அரவிந்த் கேஜரிவாலும் கல்வி மற்றும் சுகாதாரப் புரட்சி மூலம் மனித வளங்களை வலுப்படுத்துவதை வலியுறுத்தினா் என்றாா் அவா்.
