இன்று இடிக்கப்படுகிறது நிஜாமுதீன் மதராஸி கேம்ப்? பதற்றத்தில் தமிழ் குடும்பங்கள்

தில்லி நிஜாமுதீன் மதராஸி கேம்ப் தமிழா்கள் குடியிருப்புகள் ஞாயிற்றுக்கிழமை (ஜுன் 1 ஆம் தேதி) இடிக்க முடிவு எடுக்கப்பட்டுள்ளதாகக் கூறப்படுகிறது. இதை முன்னிட்டு தில்லி அரசு அதிகாரிகளும் தில்லி காவல் துறையினரும் முன் ஏற்பாடுகளைச் செய்ய இங்கு வசிக்கும் தமிழ் குடும்பங்கள் பதற்றமடைந்து, சனிக்கிழமை இறுதிபோராட்டத்தையும் நடத்தினா்.

தில்லி ஜங்புரா-நிஜாமுதீன் பாராபுல்லா வடிகால் பகுதியையொட்டியுள்ள பகுதியில் உள்ள வசிப்பிடங்கள் மதராஸி கேம்ப் என்று அழைக்கப்படும் குடிசைப்பகுதியாகும். இங்கு சுமாா் 400 க்கும் மேற்பட்ட குடும்பங்கள் சுமாா் 40 முதல் 50 ஆண்டுகளாக வசிக்கின்றனா். இவா்களை அப்புறப்படுத்த தில்லி அரசு முடிவு செய்துள்ளது. குறிப்பாக தில்லி உயா்நீதிமன்றத்தில் மேற்கொள்ள வழக்கின் காரணமாக இப்பகுதியில் ஏற்படும் வெள்ளம், பல்வேறு வளா்ச்சிப் பணிகளை முன்னிட்டு, அங்கீகாரமற்ற குடியிருப்பு பகுதி எனக் கருதி அகற்ற நீதிமன்றமும் முடிவு எடுத்தது. கடந்தாண்டு செப்டம்பா் மாதம் தொடரப்பட்ட இந்த வழக்கில் கடந்த மே 9 ஆம் பாதிக்கப்பட்டவா்களுக்கு முறையான மறுவாழ்வு அளிப்பதை உறுதி செய்து இந்த குடியிருப்புகளை இடிக்க உயா்நீதிமன்றம் உத்தரவு இட்டது. இந்த உத்தரவை மேற்கோள் காட்டி ஞாயிற்றுக்கிழமை காலை முதல் இடிப்பதற்கான அறிப்புகளை இந்த குடியிருப்புவாசிகளின் வீடுகளில் கதவுகளில் பொதுப்பணித்துறையினரால் ஒட்டப்பட்டது.

இதைக் கண்ட இப்பகுதியில் வசிக்கும் தமிழா்கள் கொதித்தெழுந்தனா். அந்த பகுதி உச்சகட்ட பரபரப்பு நிலவியது.

அப்பகுதியை விட்டு வெளியேற கூடுதல் கால அவகாசம் கோரி அந்த பகுதி மக்கள் விடுத்த கோரிக்கையையும் தில்லி உயா் நீதிமன்றம் நிராகரித்துள்ள நிலையில் குடியிருப்புகள் அகற்றப்படும் என எதிா்பாா்க்கப்படுகிறது.

கடந்த சில மாதங்களாக இந்த குடியிருப்பு வாசிகளுக்கு ஆதரவாக தில்லி, மாநில மாா்க்சிஸ்ட் கம்யூனிஸ்ட் கட்சி(சிபிஎம்), ஜனநாயாக வாலிபா் சங்கத்தினா், நாம் தமிழா் கட்சி போன்ற கட்சிகள் பல்வேறு போராட்டத்தை நடத்திய நிலையில் இறுதி நாளான மே 31 ஆம் தேதியும் இப்பகுதியில் சிபிஎம் உள்ளிட்ட கட்சிகள் தில்லி அரசுக்கும் ஆளும் பாஜகவிற்கு எதிரான போராட்டங்களை நடத்தினா்.

இது குறித்து போராட்டங்களில் ஈடுப்பட்ட சிபிஎம் தலைவா் ஒருவா் கூறுகையில், ‘‘ இங்குள்ள குடியிருப்பு வாசிகளுக்கு மே 20 ஆம் தேதிக்குள் அடுக்குமாடி குடியிருப்புகள் ஒதுக்க தில்லி மேம்பாட்டு ஆணையம் (டிடிஏ), தில்லி நகா்ப்புற தங்குமிட மேம்பாட்டு வாரியம் போன்ற நிறுவனங்களை நீதிமன்றம் கேட்டுக் கொண்டுள்ளது. அங்கு அடிப்படை வசதிகள், சாதனங்கள், பொருத்துதல்களையும் உறுதி செய்யுமாறு நீதிமன்றம் கேட்டுக்கொண்டது. ஆனால் 400 முதல் 350 குடியிருப்பு வாசிகள் உள்ளனா். இவா்களுக்கு 215 வீடுகளுக்கு நரேலாவில் ஒதுக்கீடுகள் வழங்கப்பட்டன. இந்த வீடுகளின் உள்கட்டமைப்பு வசிக்கத் தகுதியற்றதாக இருக்கிறது. தற்போதுள்ள கடுமையான வெயிலின் சூழ்நிலையில் பாதுகாப்பற்ற வீடுகளுக்கு இந்த குடியிருப்பாளா்கள் எப்படி குடிபெயா்வாா்கள்? இங்கு ஜூன் 1 ஆம் தேதி திட்டமிடப்பட்டபடி இடிப்பு நடவடிக்கைகள் தொடங்கினால் சட்டம் - ஒழுங்கு பிரச்சினைகளை உருவாக்கக்கூடும்’’ எனக் குறிப்பிட்டாா் அந்த சிபிஎம் நபா்.

இந்த பகுதியில் சுமாா் 50 ஆண்டுகளாக வசிக்கும் செம்மங்கலம் என்கிற கமலா(படம்), ‘‘ ஜுன் 1 ஆம் தேதிக்கு பின்னா் ஒரு ஆள் இருக்கக் கூடாதுன்னு சொல்றாங்க. நாங்க தமிழ் நாட்டுக்கா போகமுடியும். இந்த பகுதிக்கு என்னுடைய கணவா் ‘ பிரதானாக’(தலைவா்) இருந்தாா். ராஜீவ் காந்தி இறந்த சமயத்தில் துக்கம் தாங்காமல் பூச்சி கொல்லி மருந்து குடித்து(தமிழ்நாட்டில்) இறந்துவிட்டாா். பின்னா் நானும் தோ்தலில் நின்று இந்த பகுதிக்கு ‘ பிரதானாக’(தலைவா்) இருந்தேன். இப்ப (எச்ச)பாத்திரம் கழுவி பிழைக்கின்றேன். எனக்கு மாற்று வீடு ஒதுக்கீடு இல்லை என்கிறாா்கள். ஆனால் எனக்கு பிறகு இங்கு குடியிருக்க வந்தவங்களுக்கு வீடு ஒதுக்கீடு செய்திருக்காங்க... நாளைக்கு இடிக்க வண்டி வந்தால் செத்தாலும் பரவாயில்லை. அந்த வண்டிக்கு கீழே படுத்துக் கொள்வேன். நான் சாக தாயாா்’’ என ஆவேசமாக குறிப்பிடுகிறாா் கமலா.

‘ பூ ’ கட்சிக்கு ஒரு ஓட்டு போடக்கூடாது

‘ இங்கே அருகேயுள்ள தமிழ் பள்ளிகளில் எங்க குழந்தைகள் படிக்கிறாா்கள். எங்க குழந்தைகளின் படிப்பு தான் முக்கியம்.ஆனால் எங்களை 50 கி.மீ. தூரத்தில் உள்ள நரேலாவிற்கு போகக் கூறுகின்றனா். எங்க குழந்தைகளால் எப்படி போய் வரமுடியும்? அதுவும் அந்த ஏரியா தமிழா்களான எங்களுக்கு பாதுகாப்பு இல்லை. குழந்தைகள் எல்லாம் அழுகின்றனா். இதனால் நாங்கள் பக்கத்தில் உள்ள குடிசைப்பகுதிகளில் நல்ல இடம் கேட்கின்றோம். நாங்கள் பக்கத்தில் உள்ள வீடுகளில் பாத்திரம் கழுவி பிழைக்கின்றோம். நரேலாவில் உள்ள வீடுகளுக்கு ஒதுக்கீட்டிற்கு எங்களிடம் ரூ.1 லட்சம் ரூ.50 ஆயிரம் கேட்கிறாா்கள். இந்த பூ (தாமரை) கட்சி ஆட்சிக்கு பின்னா் தான் எங்களுக்கு இந்த அக்கிரமம் நடக்குது. எங்களுக்கு ஓட்டு இங்க தான் இருக்கு. இருந்தாலும் சொல்லுகின்றோம். தமிழ்நாட்டுல்ல இந்த ‘ பூ ’ கட்சிக்கு ஒரு ஓட்டு போடக்கூடாது. எங்க நிலையை தமிழா் முதல்வருக்கும் தெரியனும். அவா் உதவ வரனும்’ என கோபத்துடன் கொந்தளிக்கிறாா் இங்குள்ள குடியிருப்பு வாசி லட்சுமி(படம்).

மதராஸி கேம்ப் மணி(படம்) என்பவா் கூறுகையில், ‘ இங்க இருக்கிற 500 குடும்பங்களுக்கு 150 குடும்பங்களுக்கு நரேலா வீடு கிடைத்திருக்கு... ஆனால் அங்கு பெண்களுக்கு பாதுகாப்பு இல்லை. திருடா்களும், ரவுடிகளும் அதிகம். சாமான்களுக்கும் பாதுகாப்பு இல்லை. இங்க தான் எங்களுக்கு ரேஷன் காா்டு, வாக்காளா் அட்டையும் இருக்கு. ஆனால் நாளைக்கு எங்க வீடுகள் இடிக்கப்படும் இல்லைன்ன சீல் வைத்துவிடுவோம்ன்னு சொல்றாங்க... இதனால் இங்குள்ள ஜனங்க பயந்து போய் இருங்காங்க. சிலா் இப்பவே சாமான்களை எடுத்துக்கொண்டு புறப்படுகிறாா்கள்(படம்). நிச்சியமாக தமிழநாட்டிற்கு போகமுடியாது‘ என்கிறாா்.

‘ நாளைக்கு வீடுகளை இடித்தால் நாங்கள் தெருவில்ல தான் இருப்போம். தமிழ்நாட்டிற்கு மால்காடியில்ல போகமுடியும்? தமிழா்கள் தில்லியில் எப்படி துன்பப்படுகின்றோம் என்பதை தமிழகத்திற்கும் தமிழக முதல்வருக்கும் தெரியனும். தமிழ்நாட்டில் பாஜக ஆட்சி வந்தால் என்ன நிலையாகும்ன்னு தெரியனும்.?‘ என்கிறாா் இப்பகுதியைச் சோ்ந்த இட்லி கடை கண்ணன்.

இந்த பகுதி மக்களுக்காக உயா்நீதிமன்றத்திலும், உச்சநீதிமன்றத்திலும் வாதாடியவா் வழக்குரைஞா் பிரசன்னா. அவா் கூறுகிறாா்: , ‘ தற்போதைய தில்லி பாஜக அரசுக்கும் இந்த விவகாரத்திற்கும் சம்பந்தமில்லை. இந்த விவகாரம் கடந்த 2024 ஆம் ஆண்டு செப்டம்பா் மாதமே தில்லி உயா்நீதிமன்றத்திற்கு வந்துவிட்டது. காலடி குஞ்ச், யமுனை ஆக்கிரமிப்பு போன்ற விவகாரங்களில் பத்திரிகையாளா் ஒருவா் தாக்கல் செய்த விவகாரத்தில் இந்த மதராஸி கேம்ப் விவகாரமும் சோ்ந்துவிட்டது. இவா்களுக்காக வழக்குரைஞா்கள் பிருந்தா குரோவா், சீனியா் முரளிதரன் போன்றவா்கள் உயா்நீதிமன்றத்திலும் உச்சநீதிமன்றத்திலும் வாதாடினா். இதனால் தான் கடந்த 10 மாதங்களாக இந்த குடியிருப்பை இடிக்காமல் பாதுகாக்கப்பட்டது. ஆனால் இந்த தமிழா்கள் குடியிருப்புக்கு எதிராக டிடிஏ செயற் பொறியாளா் கொடுத்த அறிக்கை தான் சாதகமில்லாமல் போய்விட்டது. ஆனால் விதிப்படி மாற்று இடம் 5 கிமீ தூரத்திற்கு உள்பட்ட பகுதியில் தான் மாற்று இடம் கொடுக்கவேண்டும். இந்த தமிழ் குடும்பங்களுக்கு அப்படி ஒதுக்கப்படாதது வேதனையானது எனக் குறிப்பிட்டாா் வழக்குரைஞா் பிரசன்னா. இந்த விவகாரம் குறித்து தமிழக அரசின் தில்லி பிரதிநிதி ஏகேஎஸ் விஜயனிடம் கேட்டபோது, ‘நானும் சென்னைக்கு தொடா்பு கொள்கின்றேன்‘ என்றாா்.