வழிப்பறி: குண்டா் சட்டத்தில் 3 இளைஞா்கள் கைது

கோவை: கோவையில் வழிப்பறியில் ஈடுபட்ட 3 இளைஞா்களை போலீஸாா் குண்டா் தடுப்புச் சட்டத்தின்கீழ் கைது செய்தனா்.

கோவை மாவட்டம், கே.ஜி.சாவடி காவல் நிலைய எல்லைக்குள்பட்ட பகுதியில் ஜெயன் (50) என்பவா் ரூ.30 லட்சம் ரொக்கத்துடன் இருசக்கர வாகனத்தில் கேரளத்துக்கு கடந்த மாதம் 12-ஆம் தேதி சென்று கொண்டிருந்தாா்.

எட்டிமடை பாலத்தில் அவா் சென்று கொண்டிருந்தபோது, அவ்வழியே காரில் வந்த கேரள மாநிலத்தைச் சோ்ந்த குட்டப்பன் மகன் மனீஷ் (32), வித்யாதரன் மகன் விஷ்ணு (31), டேவிட் மகன் ஜோசப் (27) ஆகியோா் ஜெயனைத் தாக்கி பணத்தை கொள்ளையடித்துச் சென்றனா்.

இது குறித்த புகாரின்பேரில் வழக்குப் பதிவு செய்த போலீஸாா், அவா்களைக் கைது செய்து சிறையில் அடைத்தனா்.

இந்நிலையில், 3 பேரையும் குண்டா் தடுப்புச் சட்டத்தின்கீழ் சிறையில் அடைக்க மாவட்ட ஆட்சியா் பவன்குமாா் க.கிரியப்பனவருக்கு மாவட்ட காவல் கண்காணிப்பாளா் கே.காா்த்திகேயன் பரிந்துரை செய்தாா்.

இதையடுத்து, 3 பேரையும் குண்டா் தடுப்புச் சட்டத்தின்கீழ் சிறையில் அடைக்க மாவட்ட ஆட்சியா் உத்தரவிட்டாா்.

இந்த உத்தரவுக்கான நகலை சிறையில் உள்ள 3 பேரிடமும் போலீஸாா் திங்கள்கிழமை வழங்கினா்.