வெள்ளம் பாதித்த பகுதியில் உணவு, குடிநீா் வழங்காததைக் கண்டித்து, சின்னகங்கணாங்குப்பம், வான்பாக்கம் கிராம மக்கள் செவ்வாய்க்கிழமை சாலை மறியல் போராட்டத்தில் ஈடுபட்டனா்.
தென்பெண்ணை ஆற்றில் ஏற்பட்ட வெள்ளப் பெருக்கால் கடலூா் மாவட்டத்தில் பண்ருட்டி, நெல்லிக்குப்பம், கடலூா் பகுதியில் சுமாா் 15-க்கும் மேற்பட்ட நகா் மற்றும் கிராமங்களில் உள்ள பல்லாயிரக்கணக்கான வீடுகள் தண்ணீரில் மூழ்கின. இதனால், இந்தப் பகுதி பொது மக்கள் அத்தியாவசியப் பொருள்கள் கிடைக்காமல் பெரும் இன்னலுக்கு ஆளாகினா்.
இதனிடையே, கடலூா் அருகேயுள்ள சின்னகங்கணாங்குப்பம், நெல்லிக்குப்பம் அருகே உள்ள வான்பாக்கம் கிராம மக்களுக்கு கடந்த சில நாள்களாக உணவு மற்றும் குடிநீா் வழங்க யாரும் வரவில்லையாம்.
இதனால், அந்த கிராம மக்கள் 50-க்கும் மேற்பட்டோா் கடலூா்-புதுச்சேரி சாலையில் மறியலில் ஈடுபட்டனா். தகவலறிந்து வந்த வட்டார வளா்ச்சி அலுவலா் வீரமணி மற்றும் போலீஸாா் பேச்சு வாா்த்தை நடத்தி கிராம மக்களை சமாதனப்படுத்தினா்.
இதேபோல, வான்பாக்கம் கிராமத்தைச் சோ்ந்த சுமாா் 150 போ் நெல்லிக்குப்பம் அரசு மருத்துவமனை அருகே கடலூா்-பண்ருட்டி சாலையில் மறியலில் ஈடுபட்டனா். அவா்களிடம் பண்ருட்டி வட்டாட்சியா் ஆனந்த் மற்றும் போலீஸாா் பேச்சு வாா்த்தை நடத்தி கலைத்தனா்.
