இன்று இடிக்கப்படுகிறது நிஜாமுதீன் மதராஸி கேம்ப்? பதற்றத்தில் தமிழ் குடும்பங்கள்
"RCB ஃபைனலில் வெல்ல வேண்டுமென்றால், இந்த அணியை தடுத்தாக வேண்டும்!" - CSK வீரர் அஸ்வின் சொல்வதென்ன?
Admin
- yesterday
ஐபிஎல்-லில் 17 சீசன்களாக சாம்பியன் பட்டம் வெல்லாத, அதேசமயம் அதிக ரசிகர்கள் ஆதரவு கொண்ட ஒரே அணி ராயல் சேலஞ்சர்ஸ் பெங்களூரு (RCB) அணி.
2009, 2011, 2016 ஆகிய சீசன்களில் மூன்று விதமான கேப்டன்கள் தலைமையில் இறுதிப்போட்டிக்கு முன்னேறியும் பெங்களூரு அணியால் கோப்பை வெல்ல முடியாமல் போனது.
இதனால், வழக்கம்போல இந்த சீசனில் கோப்பை வெல்ல வேண்டும் என்ற ஒரே நோக்கில் புதிய கேப்டன் ரஜத் பட்டிதார் தலைமையில் களமிறங்கியது ஆர்.சி.பி.
அதோடு, கோலியின் ஜெர்ஸி நம்பரும், இந்த சீசன் நம்பரும் 18 என்பதால், ரசிகர்கள் பெரும் எதிர்பார்ப்பைக் கொண்டிருக்கின்றனர்.
அந்த எதிர்பார்ப்புகளையெல்லாம் இதுவரை எந்தவொரு ஏமாற்றமும் தராமல் நிறைவேற்றிவரும் பெங்களூரு அணி, குவாலிஃபயர் 1-ல் பஞ்சாப் அணியை வீழ்த்தி 4-வது முறையாக இறுதிப்போட்டிக்குள் நுழைந்து கோப்பைக்கு ஓரடி தூரத்தில் நிற்கிறது.
இந்த நிலையில், ஆர்.சி.பி அணி கோப்பை வெல்ல வேண்டுமென்றால் எப்படியாவது மும்பை அணியை இறுதிப்போட்டிக்கு வராமல் தடுக்க வேண்டும் என்று சி.எஸ்.கே வீரர் அஸ்வின் கூறியிருக்கிறார்.
தனது யூடியூப் சேனலில் பேசிய அஸ்வின், "ஆர்.சி.பி அணி சாம்பியன் பட்டம் வெல்ல வேண்டுமென்றால், மும்பை அணியை குஜராத் அணி (எலிமினேட்டர் போட்டியில்) வெல்ல வேண்டும்.
மும்பை அணி இறுதிப்போட்டிக்குள் நுழைவதை எப்படியாவது தடுக்க வேண்டும். இறுதிப்போட்டிக்கு மும்பை வரக்கூடாது என்று பெங்களூரு பிரார்த்தனை செய்யும்.
ஆனால், இது கிரிக்கெட். இதில் எதுவேண்டுமானாலும் நடக்கலாம். இப்போது நான் ஆர்.சி.பி அணியாக இருந்தால், இறுதிப்போட்டியில் குஜராத்தை எதிர்கொள்ள விரும்புவேன்" எனக் கூறினார்.
மேலும், விராட் கோலி குறித்து பேசுகையில், "விராட் கோலிக்கு ஒரு விஷயத்தைச் சொல்ல விரும்புகிறேன். இந்த சீசன் ஆர்.சி.பி-க்கானது என்று உணர்கிறேன்.
பொதுவாக கோலியிடம் ஐ.சி.சி கோப்பைகள் இல்லை என்று கூறுவார்கள். ஆனால், கடந்த ஓராண்டு காலத்தில் இரண்டு ஐ.சி.சி கோப்பைகளை (டி20 உலகக் கோப்பை, சாம்பியன்ஸ் டிராபி) வென்றிருக்கிறார்.
அது கேப்டனாக இல்லையென்றாலும், வெற்றியின் மையமாக இன்றும் அவர் இருக்கிறார். கோலியும் இந்தியாவின் சிறந்த டெஸ்ட் கேப்டன்களில் ஒருவர்.
ஆர்.சி.பி-யின் முதல் கோப்பையை 18-வது சீசனில் அவர் வெல்லப்போகிறாரா?
ஒருவேளை இறுதிப்போட்டியில் சேசிங் என்றால் அந்த சூழ்நிலைகளை எவ்வாறு கையாள்வது என்பது கோலிக்குத் தெரியும்" என்று அஸ்வின் கூறினார்.
